Հոկտեմբերի 12-ին լրանում է աշխարհահռչակ հայ դուդուկահար և կոմպոզիտոր Ջիվան Գասպարյանի 98-ամյակը
Ջիվան Գասպարյանը ոչ միայն մեծ արվեստագետ էր, այլև այն եզակի հայերից մեկը, ով դուդուկի ձայնը հասցրեց աշխարհի ամենահեղինակավոր բեմերի՝ հայկական երաժշտությունը դարձնելով համաշխարհային մշակույթի անբաժանելի մաս։
Հայաստանի և Կանադայի երաժշտական ակադեմիաների անդամ, ՀԽՍՀ ժողովրդական արտիստ Ջիվան Գասպարյանը մեծ ավանդ է թողել հայ ժողովրդի մշակութային կյանքում։ Նրա արվեստը դարձավ սերունդներին փոխանցվող ժառանգություն, իսկ դուդուկի յուրահատուկ ձայնը՝ Հայաստանի մշակութային այցեքարտերից մեկը։
Այսօր Ջիվան Գասպարյանի գործը շարունակվում է։ Նրա ընտանիքըշ աշակերտներն եւ թոռը՝ Ջիվան Գասպարյանը շարունակում են պահպանել և տարածել մեծ վարպետի երաժշտական ժառանգությունը՝ նոր սերունդներին փոխանցելով դուդուկի նկատմամբ նրա սերն ու նվիրումը։
InterNews.info-ի հետ զրույցում թոռը՝ Ջիվան Գասպարյանը ընդգծել է, որ մեծ վարպետի թողած ժառանգությունը պարզապես անցյալի հիշողություն չէ․ այն շարունակվող ճանապարհ է։
«Պապիկս մեծ համբավ է թողել ժողովրդին։ Ես այս սիրով շարունակում եմ նրա գործը և այսօր պատրաստվում ենք նոր, մեծամասշտաբ միջոցառումների՝ նրա անունն ու արվեստը նոր սերունդներին փոխանցելու համար»։
Ջիվան Գասպարյանի արվեստը շարունակում է ապրել՝ դուդուկի յուրաքանչյուր հնչյունի մեջ։
Եվ նրա ժառանգության ամենակարևոր պատգամներից մեկը մնում է նույնը՝ պահպանել հայկական երաժշտությունը, զարգացնել այն և հասցնել աշխարհին։
