InterNews.info-ի հյուրը՝ նկարիչ Մարատ Թելոյանը
Արվեստը մարդու ներաշխարհի արտահայտությունն է։ Յուրաքանչյուր նկար իր մեջ կրում է հեղինակի զգացողությունները, ապրումները և հոգու մի մասը։ Արվեստը ոչ միայն տեսնելու, այլ նաև զգալու կարողություն է։ Այն հոգու դրսևորում է և հոգու կանչ, որը մարդուն ուղեկցում է ամբողջ ստեղծագործական ճանապարհի ընթացքում։
–Բարև Ձեզ, հարգելի՛ Մարատ։ Շնորհակալ ենք, որ ընդունեցիք մեր հրավերը։ Նախ կխնդրեմ պատմել՝ ինչպե՞ս սկսվեց Ձեր ճանապարհը դեպի արվեստ։
-Բարև Ձեզ, շնորհակալ եմ հրավերի համար։ Իմ սերը դեպի արվեստը սկսվել է դեռ մանկուց։ Երբ ինձ հիշում եմ, միշտ նկարել եմ։ Նկարչությունն ինձ համար պարզապես զբաղմունք չէ, այլ ինքնարտահայտման ձև։ Սովորել և ավարտել եմ **Los Angeles Valley College**-ի Արվեստի ստուդիայի բաժինը, որտեղ ավելի խորացրի իմ մասնագիտական գիտելիքներն ու հմտությունները։
–Ինչո՞ւ որոշեցիք տեղափոխվել Միացյալ Նահանգներ։
-Միացյալ Նահանգներ տեղափոխվել եմ 2019 թվականին՝ ընտանիքիս՝ կնոջս և երկու որդիներիս հետ։ Մեր տեղափոխության պատճառը «Green Card» վիճակախաղում հաղթելն էր։ Այսօր մեր ընտանիքը զբաղվում է տոնական պատվերով թխվածքների արտադրությամբ։ Մենք մեծ սիրով ստեղծում ենք յուրահատուկ և գեղեցիկ թխվածքներ տարբեր առիթների համար։
–Ի՞նչ է անհրաժեշտ լավ արվեստագետ դառնալու համար։
-Կարծում եմ՝ «արվեստագետ» կոչումը շատ պատվավոր է։ Այդ կոչմանը հասնելու համար անհրաժեշտ են մեծ աշխատանք, նվիրվածություն և շարունակական զարգացում։ Տաղանդը կարող է ճանապարհը մի փոքր հեշտացնել, սակայն միայն տաղանդը բավարար չէ։ Իրական հաջողության հասնում է նա, ով մշտապես աշխատում է իր վրա, զարգացնում է իր հմտությունները և երբեք չի դադարում սովորել։
Բացի այդ, արվեստագետ դառնալու համար մեկ նախապայման չկա, բայց կա մի կարևոր հատկանիշ, առանց որի իսկական արվեստ հնարավոր չէ ստեղծել։ Արվեստի մարդը չի կարող լինել հոգով չար, նախանձ կամ նեղ մտածող։ Իսկական արվեստը ծնվում է սիրուց, բարությունից, ազնվությունից և անկեղծությունից։
–Ի՞նչ թեմաներով եք ստեղծագործում։
-Իմ բոլոր նկարները տարբեր են։ Յուրաքանչյուր աշխատանք ունի իր յուրահատուկ գաղափարը, պատմությունը և էներգետիկան։ Ամեն կտավ ստեղծվում է տվյալ պահի ապրումներից ու տրամադրությունից և փոխանցում է տարբեր զգացողություններ։ Ինձ համար կարևոր է, որ յուրաքանչյուր նկար խոսի դիտողի հետ իր լեզվով։
–Ի՞նչ նպատակներ ունեք առաջիկա տարիների համար։
-Առաջիկա տարիներին ցանկանում եմ աշխատել ավելի ակտիվ, ստեղծագործել առանց դադարի և կյանքի կոչել բազմաթիվ նոր գաղափարներ ու նախագծեր։ Իմ նպատակն է շարունակել զարգանալ որպես արվեստագետ, մասնակցել նոր ցուցահանդեսների, ներկայացնել իմ աշխատանքները ավելի լայն լսարանի և իմ ներդրումն ունենալ ժամանակակից արվեստում։
-Ի՞նչ կցանկանայիք ասել մեր ընթերցողներին։
-Շնորհակալ եմ այս հետաքրքիր զրույցի համար։ Կցանկանայի հատկապես մեր երիտասարդներին ասել՝ երբեք մի՛ հրաժարվեք ձեր երազանքներից և մի՛ դադարեք աշխատել ձեր նպատակներին հասնելու համար։ Տաղանդը տարիք չի ճանաչում, իսկ հաջողությունը գալիս է նրանց, ովքեր հավատում են իրենց և ամեն օր աշխատում են իրենց երազանքների ուղղությամբ։
Կից ներկայացնում ենք Մարատ Թելոյանի պորտֆելիոն։
Նկարների գնման կամ հրավերքների համար
Կոնտակտ՝
Instagram: @matelo2511
