Արվեստը յուրօրինակ աշխարհ է՝ մարդկային մտքի, հոգու և զգացմունքների արտահայտությունը։ Հենց այդ աշխարհով է ներշնչված մեր երիտասարդ արվեստագետը, ով իր ստեղծագործություններով փորձում է փոխանցել իր ներաշխարհը և մարդկանց համար բացել նոր տեսանկյուններ։
InterNews.info-ն զրույց է պատրաստել երիտասարդ նկարիչ, գրաֆիկ դիզայներ Հարություն Հարությունյանի հետ։
Բարև Ձեզ, հարգելի՛ Հարություն։ Շնորհակալ ենք, որ ընդունեցիք մեր հրավերը։ Նախ կխնդրեմ պատմել՝ ինչպե՞ս սկսվեց Ձեր ճանապարհը դեպի արվեստ։
– Բարև Ձեզ։ Ես նույնպես շնորհակալ եմ հրավերի համար։
Ամեն ինչ սկսվեց 1990 թվականի ապրիլի 1-ին, երբ ես ծնվեցի։ Արվեստի հանդեպ սերս ձևավորվել է դեռ վաղ մանկությունից։ Ծնողներս պատմում էին, որ նույնիսկ երկու տարեկանը չբոլորած՝ ես նախընտրում էի խաղալ գունավոր մատիտներով։
Ունեմ ակադեմիական կրթություն, մասնագիտությամբ նկարիչ և գրաֆիկ դիզայներ եմ։ 2024 թվականից բնակվում եմ Միացյալ Նահանգներում։
– Ինչո՞ւ որոշեցիք տեղափոխվել Միացյալ Նահանգներ։
– Դա նախապես ծրագրված որոշում չէր, պարզապես այդպես ստացվեց։ Ես շատ եմ սիրում Ամերիկան՝ որպես հնարավորությունների երկիր։
Այստեղ հաճելի է աշխատել մարդկանց հետ։ Երբ ամերիկացիները իմանում են, որ նկարիչ եմ, մեծ հետաքրքրությամբ են արձագանքում, ցանկանում են տեսնել աշխատանքներս և զրուցել արվեստի մասին։
Միացյալ Նահանգներում հիմնականում զբաղվում եմ նկարչությամբ և մասնակցում տարբեր ցուցահանդեսների։ Ինձ համար մեծ ուրախություն է, որ այստեղ կարողացա ծանոթանալ արվեստով զբաղվող հետաքրքիր մարդկանց, որոնց հետ միասին փորձում ենք ամերիկյան արվեստասեր հասարակությանը ներկայացնել հայկական արվեստն ու մշակույթը։
Տեղափոխվելուց ընդամենը մի քանի օր անց, սակայն, բարդ փորձության հանդիպեցի․ կոտրեցի ձեռքս։ Անցա մի քանի ամիս տևած բուժման ճանապարհ։ Ձեռքս դժվարությամբ էի շարժում, իսկ կոտրված ձեռքով նկարելը չափազանց դժվար էր։ Բայց կարծում եմ՝ երբ մարդը հայտնվում է դժվար իրավիճակում, իր մեջ գտնում է այնպիսի ուժ, որի գոյության մասին նույնիսկ չէր կասկածում։
– Ի՞նչն է Ձեզ ոգեշնչում։
– Ոգեշնչման աղբյուրները շատ են, բայց եթե պետք է առանձնացնեմ մեկը, ապա դա ապրելու ցանկությունն է։ Կարծում եմ՝ արվեստագետը, անկախ իր կամքից, պետք է ստեղծագործի։ Ստեղծագործելը նրա ներքին պահանջն է։
– Ձեր ո՞ր նկարը կառանձնացնեք։
– Իմ ամենասիրելի նկարը դեռ չեմ ստեղծել։ Սակայն այս պահին կառանձնացնեմ «Ճանապարհ դեպի գիտելիք» աշխատանքը։ Այն ունի սիմվոլիկ նշանակություն և ուսուցողական գաղափար։ Ինչպես իմ շատ աշխատանքներ, այն նույնպես ստեղծված է մաթեմատիկայում կիրառվող ոսկե հատման կանոնի հիման վրա։
Կարծում եմ՝ որքան շատ գիտելիք ունենա մարդը, այնքան ավելի շատ ճանապարհներ կբացվեն նրա առջև։ Բայց ամենակարևորն այն է, որ նա հավատա իր գիտելիքի ուժին։
– Ի՞նչ է անհրաժեշտ լավ արվեստագետ դառնալու համար։
– Կարծում եմ՝ արվեստագետ չեն դառնում միայն սովորելով, արվեստագետ ծնվում են։ Իհարկե, մարդը կարող է սովորել նկարել և կատարելագործել իր տեխնիկան, բայց արվեստագետ լինելը շատ ավելի խոր իմաստ ունի։
Արվեստագետը աշխարհին նայում է արվեստի պրիզմայով։ Նա ստեղծագործելու ներքին պահանջ ունի՝ անկախ այն հանգամանքից, թե ինչ դժվարությունների է հանդիպում։
Արվեստագետներն ունեն յուրահատուկ էներգիա, որը երբեմն դժվար է նկարագրել բառերով. այն պարզապես պետք է զգալ։ Նրանք ունեն այս աշխարհին նոր երանգ և նոր տեսանկյուն հաղորդելու առաքելություն։
Իսկական նկարիչը պետք է անկեղծ լինի իր արվեստի հանդեպ և համառորեն շարունակի իր ճանապարհը՝ հաղթահարելով բոլոր դժվարությունները։
– Ի՞նչ թեմաներով եք ստեղծագործում։
– Ես ցանկանում եմ գնալ այն ճանապարհով, որով դեռ ոչ ոք չի գնացել, և ստեղծել նոր ուղղություն։
Իմ նկարների միջոցով փորձում եմ ներկայացնել այն ամենը, ինչ մենք բոլորս տեսնում ենք, բայց հաճախ չենք նկատում։
Քնելուց առաջ, երբ փակում ենք մեր աչքերը, շատերը տեսնում են մուգ կապույտ և մանուշակագույն ֆոն, որտեղ կարծես փոքրիկ կայծեր են շարժվում։ Այդ պահին տարբեր պատկերներ են առաջանում, և ես փորձում եմ դրանք փոխանցել կտավի վրա։
Շատերը սկզբում չեն հասկանում, թե ինչ եմ նկարել, բայց երբ բացատրում եմ գաղափարը, ասում են, որ իրենք նույնպես նման զգացողություններ են ունեցել։ Իմ նպատակն է մարդկանց ստիպել ավելի ուշադիր նայել իրենց ներաշխարհին։
– Ի՞նչ նպատակներ ունեք առաջիկա տարիների համար։
– Իմ նպատակն է համագործակցել արվեստի ոլորտի մասնագետների և արտ-դիլերների հետ, ինչպես նաև իմ աշխատանքներով ճանաչելի դառնալ հնարավորինս լայն հասարակության համար։
– Երբևէ մտածե՞լ եք հանձնվելու մասին։ Եթե այո, ի՞նչն է Ձեզ ուժ տվել շարունակելու։
– Ես երբեք չեմ մտածել հանձնվելու մասին և նույնիսկ չեմ ցանկանում այդ մասին մտածել։ Առջևում դեռ երկար ստեղծագործական ճանապարհ կա։
– Ի՞նչ կցանկանայիք ասել մեր ընթերցողներին։
– Կցանկանայի ասել՝ ինչ էլ անում եք, արեք սիրով և անկեղծությամբ։ Կրթվեք, ձեռք բերեք գիտելիք, որովհետև գիտելիքի ուժը մարդկության ամենամեծ ուժերից մեկն է։
– Ի՞նչ խորհուրդ կտաք երիտասարդ արվեստագետներին, ովքեր նոր են սկսում իրենց ճանապարհը։
– Անկախ բոլոր դժվարություններից՝ շարունակեք առաջ շարժվել, հավատացեք ձեր ուժերին և երբեք մի հանձնվեք։
– Ի՞նչ կցանկանայիք ավելացնել։
– Եվս մեկ անգամ ցանկանում եմ շնորհակալություն հայտնել հրավերի համար։
Կոնտակտ Հարությունի հետ՝
7474447484
Ինսթագրամ՝ www.instagram.com/hharutyunyan.art
Ֆեյսբուք՝ www.facebook.com/hharutyunyan.art
