«Քաղաքացու իրավունքների պաշտպան» ՍՊԸ-ի հիմնադիր, իրավաբան Տիգրան Սարգսյանն իր ֆեյսբուքյան էջում գրել է.
-Ինչպես օրերս հայտնի դարձավ, «Վիվասել»-ը վաճառվում է, իսկ վաճառքի գործընթացին պետական մարմինների կողմից համաձայնություն տալու հարցն արդեն որոշված է։ Նշված պատմությունը շատ տարօրինակ է, և բազմաթիվ հարցերի ու կասկածների տեղիք է տալիս։
Մասնավորապես, պարզվում է, որ «Վիվասելի» գնորդն այն նույն անձինք են, որոնց հետ գործարքն արդեն իսկ մերժվել է ազգային անվտանգության շահերից ելնելով։ Այն ժամանակ Հանրային ծառայությունները կարգավորող հանձնաժողով էին դիմել 2023 թվականի հունվարի 26-ին, որից հետո շուրջ երեք ամիս ուսումնասիրելուց հետո հանձնաժողովը 2023 թվականի ապրիլի 12-ին որոշեց չթույլատրել գործարքը՝ հաշվի առնելով, որ այն կարող է վնասել ազգային անվտանգության շահերին։
Ներկայումս Կիպրոսում գրանցված նույն ընկերությունը Վիվասելի հետ համատեղ 2023 թվականի նոյեմբերի 3-ին կրկին հայտ է ներկայացրել Հանրային ծառայությունները կարգավորող հանձնաժողով, որին արդեն 2023 թվականի նոյեմբերի 15-ի որոշմամբ պատրաստվում է համաձայնություն տալ հանձնաժողովը։
Այստեղից առաջանում են բազմաթիվ մտահոգություններ, ինչպես ստացվեց, որ ազգային անվտանգությանը սպառնացող գործարքն այլևս ազգային անվտանգությանը սպառնալիք չի ներկայացնում, որտեղ և ինչպես է որոշվել գործարքի թույլատրման հարցի լուծումը, քանի որ ամիսներ տևող ուսումնասիրության փոխարեն այս անգամ 12 օրում (ուսումնասիրությունների բուն տևողությունն ընդհամենը 2 օր) որոշվել է թույլատրել գործարքը, նշված գործընթացն ամբողջությամբ իրականացվում է գաղտնի, որևէ պաշտոնատար անձ հրապարակային որևէ մեկնաբանություն չի տվել նշված գործարքի վերաբերյալ, թե ովքեր են ձեռքբերողները, ինչ բիզնես ծրագիր ունեն, ինչ է սպասվում շուրջ 2 միլիոն բաժանորդ ունեցող կազմակերպությանը և այլն։
Նշվածը մտահոգություններ են առաջացրել քաղաքացիական հասարակությունը ներկայացնող կազմակերպությունների շրջանում, որոնք մտադիր են օրենքով իրենց վերապահված իրավունքների շրջանակներում հետամուտ լինել գործարքի իրական հանգամանքների բացահայտմանը, իսկ դրացում սպառնալիք տեսնելու դեպքում, բոլոր հնարավոր եղանակներով պայքարել, որպեսզի գործարքը չկայանա։
Բոլոր դեպքերում մեր կողմից կատարված շատ հպանցիկ համացանացային ուսումնասիրություններից ակնհայտ է դառնում որ Վիվասելը գնել ցանկանցող ընկերության իրական սեփականատերը կապված են շատ խնդրահարույց ընկերությունների և միջազգային հետախուզման մեջ տգնվող անձանց հետ, ինչն իրապես առաջացնում է այն ողջամիտ մտավախությունները, որ առկա է ազգային անվտանգությանը սպառնացող ակնհայտ ռիսկեր:
Մեր կողմից կատարվող այդ ուսումնասիրությունները գտնվում են նախապատրաստական փուլում և կհրապարակվեն դրանց պատրաստ լինելուն պես: Բոլոր դեպքերում կարծում ենք, որ ՀՀ իրավասու մարմինները պետք է անհասկանալի շտապողականություն ցուցաբերելու փոխարեն մանրակրկիտ ուսումնասիրեն այդ ընկերությանը և դրան փոխկապակցված անձանց, իսկ այդ ընթացքում կասեցնեն գործարքի թույլտվության տրամադրումը:
