Հուլիսի 7-ին տեղի է ունեցել «Made in Armenia» ՀԿ Փոքր և միջին ձեռնարկատիրության աջակցման ծրագրի շնորհանդեսը: Միջոցառմանը մասնակցել են պետական պաշտոնյաներ, շահագրգիռ այլ կառույցների ներկայացուցիչներ, փորձագետներ, փոքր և միջին ձեռնարկությունների ներկայացուցիչներ:
Ողջունելով հյուրերին՝ «Made in Armenia» ՀԿ նախագահ Աշոտ Գրիգորյանը նշել է, որ գործունեության կարճ ընթացքում Կազմակերպությունը կարողացել է ստեղծել իր «հաջողությունների պատմությունը»՝ աջակցելով ՓՄՁ և տարբեր ոլորտներում ծառայություններ մատուցող ընկերությունների միջև կապերի ստեղծմանը՝ այդ թվում ներդրումների ներգրավման, վաճառքի խթանման նպատակով: Այժմ, ըստ նրա, տեղացի և արտասահմանյան գործընկերների հետ քայլեր են ձեռնարկվում հայ արտադրողների աջակցության համար բիզնես աքսելերատորի և բլոկչեյն տեխնոլոգիաների վրա հիմնված ֆինանսավորման գործիքի ներդրման ուղղությամբ:
Այդ ծրագրերի մանրամասներ ներկայացրեց «Blockcentro» ընկերության Գործադիր տնօրեն Քրիստիանո Վոլպին (Իտալիա):
Կառավարության ներկայիս ծրագրով պետությունը որդեգրել է ՓՄՁ-ների կշիռը բարձրացնել ավելացված արժեքում ընդհուպ 50 տոկոս:
ՀՀ էկոնոմիկայի փոխնախարար Ռաֆայել Գևորգյանը, կարևորելով մասնավոր հատվածի հետ երկխոսությունը, անդրադարձավ Կառավարության ծրագրերին: Նա նշեց, որ. «փոքր և միջին ձեռնարկատիրության կայացումը առանցքային դեր ունի, դա ստեղծում է միջին խավ, ինչն էլ իր հերթին բերում է ներառական քաղաքական համակարգի: Այս խնդիրը դրված է Կառավարության առջև»:
Էկոնոմիկայի փոխնախարար Արմեն Արզումանյանը, իր հերթին, արտահանման խթանման և տնտեսության զարգացման առումով կարևորեց տնտեսական դիվանագիտության ինստիտուտի կայացումը: «Ունենք նաև խնդիրներ լոգիստիկ առումով: Պետք է զարգացնել Հայաստանի լոգիստիկ ցանցը»,- ասաց նա՝ հավելելով, որ շուտով Հայաստանը դեպի Եվրոպա ու ՌԴ արտահանում կկարողանա կազմակերպել երկու լաստանավով:
«Export Armenia» ասոցիացիայի համահիմնադիր Նարեկ Ալեքսանյանը արտահանման տեսանկյունից կարևորել է նաև մասնագիտական ներուժի զարգացումը: «Եթե մոտակա 2-3 տարվա ընթացքում չունենանք մինչև 500 մասնագետ, որոնք հստակ կարող են 3-ից 4 լեզվով, լայն աշխարհագրությամբ բանակցել, տիրապետել թվային գործիքների, ապա առաջ չենք գնալու, զարգացում չենք ունենալու: Արտահանման պարագայում կարևոր գործոն է վաճառքը: Կարևորեք այն մարդկանց, որոնք զբաղվում են ձեր ապրանքի վաճառքով: Թիրախավորեք այն երկրները, որտեղ ձեր ապրանքը կարող է երկար վաճառվել: Հաջորդիվ` այդ երկրի լեզվին, մշակույթին տիրապետող մասնագետներ ներգրավենք: Ի վերջո, կայուն որակ ապահովենք»,-ասել է Ալեքսանյանը:
Մասնակիցները պայմանավորվեցին նման հանդիպումները դարձնել պարբերական:
