Երևանի ընդհանուր իրավասության առաջին ատյանի դատարանը արդեն երկրորդ անգամ մերժում է Պետական եկամուտների կոմիտեի (ՊԵԿ) միջնորդությունը՝ կալանավորել Հայաստանի երրորդ նախագահ Սերժ Սարգսյանի փեսա, Սուրբ Աթոռում Հայաստանի նախկին դեսպան Միքայել Մինասյանին։
Մերժման որոշումը կայացրել է Ավանի նստավայրի դատավոր Վահագն Մելիքյանը։
Հետախուզման մեջ գտնվող և պարբերաբար իր բնակության վայրի խոհանոցից իշխանությունների հասցեին քննադատական տեսանյութեր տարածող Միքայել Մինասյանին ամիսներ առաջ մեղադրանք է առաջադրվել մի քանի հոդվածներով՝ ապօրինի հարստացման, հայտարարագրում կեղծ տվյալներ ներկայացնելու և հանցավոր ճանապարհով ստացված գույքը օրինականացնելու համար։ Նա մեղադրանքը չի ընդունում։
Փաստաբան Ամրամ Մակինյանն «Ազատության» հետ զրույցում փոփանցեց, որ նիստը կայացել է կեսգիշերին, և դեռ որոշումը չեն ստացել։ Հավելեց, որ երկրորդ անգամ Մինասյանին կալանավորելու մասին միջնորդության հիմքում ՊԵԿ-ը նոր դրվագ է ներառել, որն առնչվում է բեռնափոխադրում իրականացնող «Սպայկա» ընկերությանը։
«Այդ դրվագի մասին խոսվել է նաև քաղաքական շրջանակներից մինչև ավելացնելը, այս մասը ես հատկապես ուզում եմ ընդգծել, խոսքը վերաբերում է «Սպայկա» ընկերությանը: Վերագրվել է «Սպայկա»-ի գործունեության ինչ-որ մի մասը պարոն Մինասյանին», – ասաց Մակինյանը:
ՊԵԿ-ից «Ազատությանը» փոխանցեցին, որ հուլիսի 5-ին դատավոր Վահագն Մելիքյանի կայացրած որոշման հիմք է հանդիսացել բացառապես քրեական դատավարության օրենսգրքի համապատասխան հոդվածի պահանջների յուրովի մեկնաբանումը և իրավիճակի գնահատումը։ Դա, սակայն, կասկածի տակ չի դնում Միքայել Մինասյանին մեղսագրվող հանրորեն վտանգավոր արարքների կատարված լինելու հանգամանքը: Ավելին, թե՛ այս որոշմամբ, թե՛ նաև վերաքննիչ
դատարանի կողմից կայացված որոշմամբ որևէ անդրադարձ չի կատարվել Մինասյանին մեղսագրված հանրորեն վտանգավոր արարքների կատարման հիմնավոր կասկածին․ – «Այսինքն, մինչ օրս Միքայել Մինասյանի նկատմամբ կալանավորումը որպես խափանման միջոց ընտրելու մասին քննարկված ու կայացված դատական ակտերից միայն մայիսին՝ դատավոր Արտուշ Գաբրիելյանի կայացած որոշմամբ է քննարկվել և վերլուծվել Մինասյանի մեղադրանքի հիմնավոր կասկածի և կալանավորման հիմքերի առկայությունը, որը դատարանի կողմից գնահատվել է իրավաչափ»:
Ըստ ՊԵԿ-ի, քննությունը պարզել է, որ Սուրբ Աթոռում Հայաստանի նախկին դեսպանը 2012-2018 թվականներին կասկածելի աղբյուրներից ստացած խոշոր ֆինանսական միջոցներով, քողարկված եղանակով, Շոտլանդիայում հաշվառված օֆշորային «Ուոլտեքս Էքսպրես Էլ Փի» կազմակերպության միջոցով և ապա իր մտերիմներից Ռոզա Ստեփանյանի միջոցով, վերջինիս օժանդակությամբ հանդիսացել է «Սպայկա» ընկերության 49 տոկոս բաժնեմասի փաստացի բաժնետերը, սակայն այդ մասին ոչինչ չի նշել իր հայտարարագրերում։
Սա Պետական եկամուտների կոմիտեի երկրորդ միջնորդությունն էր առաջին ատյանի դատարան։ Նմանատիպ միջնորդություն նախաքննական մարմինը ներկայացրել էր անցած մայիսին։ Այն ժամանակ դատավոր Արտուշ Գաբրիելյանը բավարարել էր այն և կալանավորման որոշում կայացրել։ Մինչդեռ Մինասյանի փաստաբանները այս որոշումը բողոքարկել էին վերաքննիչ ատյանում, որն էլ վերացրել էր նրանց պաշտպանյալին կալանավորելու որոշումը։
Նյութի աղբյուրը՝ www.azatutyun.am
