2008 թվականի մարտի 1-2-ի արյունալի իրադարձությունների 10 զոհերից 9-ի իրավահաջորդների ներկայացուցիչ, փաստաբան Տիգրան Եգորյանն «Ազատությանը» փոխանցեց՝ իրենք ևս բողոքարկելու են Վերաքննիչի որոշումը։
Վերաքննիչ դատարանի դատավոր Արսեն Նիկողոսյանը երեկ որոշեց աննախադեպ՝ 2 միլիարդ դրամ գրավի դիմաց ազատ արձակել սահմանադրական կարգը տապալելու, ինչպես նաև առանձնապես խոշոր չափերով կաշառք ստանալու համար մեղադրվող նախկին նախագահ Ռոբերտ Քոչարյանին։
Դատախազությունը ևս պատրաստվում է բողոքարկել, դրա համար կողմերը 15 օր ունեն։
Եգորյանը համամիտ է այս գործով դատախազ Գևորգ Բաղդասարյանի հետ, թե գրավով հնարավոր չի լինի չեզոքացնել գործը խոչընդոտելու վտանգը։
«Հաշվի առնելով գործի փաստական հանգամանքները, գործի նյութերը, մեղսագրվող այդ հանցավոր արարքի բովանդակությունը, բնույթը, դրա իրագործմանը լծված անձանց, պաշտոնյաների, Ռոբերտ Քոչարյանի անձի, ինչպես նաև տարբեր այլ քրեական գործերի, որոնցով որ կան անուղղակի ապացույցներ Ռոբերտ Քոչարյանի կողմից գործի քննությանը խոչընդոտելու ռիսկի վերաբերյալ, հստակ է, որ որևէ այլ խափանման միջոց, որը պայմանավորված չի նրա ազատությունից զրկելու և հաղորդակցության սահմանափակման հետ, ի զորու չի լինելու չեզոքացնել այդ ռիսկը», – հայտարարեց փաստաբանը:
Եգորյանը համոզված է՝ ազատության մեջ, երկու ժամկետ պաշտոնավարած Ռոբերտ Քոչարյանը տարբեր եղանակներով կսկսի ազդել գործով անցնող անձանց վրա. – «Տարբեր համաձայնություններ, որոնք կարող են կնքվել, ձևավորվել ինչպես մյուս ամբաստանյալների, այնպես էլ գործով տարբեր վկաների հետ, դրանք էական ազդեցության հնարավորություն ունեն գործի ելքի վրա: Եվ այդ համաձայնությունների ձևավորման համար ընդամենը անհրաժեշտ է, որ Ռոբերտ Քոչարյանը գտնվի ազատության մեջ և պատշաճ իրավաբանական, այսպես ասած, ուղեկցման պայմաններում ճիշտ համաձայնությունների գա իր հետ ամբաստանվողների և այն վկաների [հետ], որոնք որ մեղսագրվող հանցագործությունը հիմնավորելու բավարար ապացույցներ են ներկայացնում ցուցմունքների տեսքով: Էս համաձայնություններն արդյունքում բերելու են այն հետևանքի, որը կոչվում է գործին խոչընդոտել»:
Աղբյուրը՝
