Էջմիածնի քաղաքապետ Կարեն Գրիգորյանն իր դեմ բողոքողներին կոչ է անում՝ գնալ Էջմիածնի կենտրոնի հաշտության նստարանի մոտ եւ հաշտվել: Այս մասին ասաց Էջմիածնի քաղաքապետ Կարեն Գրիգորյանը լրագրողների հետ զրույցի ժամանակ: Նա հորդորը ուղղված էր ԱԺ նախկին պատգամավոր Հակոբ Հակոբյանին, քաղաքապետի ընտրությունների ժամանակ քաղաքապետի թեկնածու Կարեն Թումանյանին, նախկին քաղաքապետ Հրաչիկ Աբգարյանին, նրա եղբորորդի Ստեփան Աբգարյանին: «Իմ նպատակն է չսրել իրավիճակը: Ես ճիշտ չեմ գտնում ժողովրդին իրար դեմ հանելը: Ի՞նչ կտա մեզ, եթե դուք 3000 հոգի բերեք, հետո մենք՝ 5000, հետո դուք՝ 10.000 և այլն: Ես առաջին քայլն անում եմ, հաշտության նստարանի մոտ սպասում եմ»,-ասաց Կարեն Գրիգորյանը: Կարեն Գրիգորյանը բնական է համարում, որ իր քաղաքապետի պաշտոնում լինելը ոչ բոլորին է դուր գալիս. «Էջմիածնում 3000 քաղաքացի ինձ չի ընտրել ընտրությունների ժամանակ, բնական է, որ դժգոհողներ էլ կլինեն: Բայց իմ հասցեին հնչում են մեղադրանքներ, որոնք փաստացի քաղաքապետի լիազորությունների շրջանակներում չեն: Մեղադրանքներ են հնչում՝ հիվանդանոցների հետ կապված, դպրոցի հետ կապված, որտեղ ես լիազորություն չունեմ, չունեմ լիազորություն՝ ասֆալտապատելու շրջակա գյուղերը: Մերձավան գյուղի գյուղապետի արած ապօրինությունների հարցերով են ինձ դիմում: Մեղադրանքների մեծ մասը հնչում է իրականում իմ լիազորություններից դուրս խնդիրների մասին»,- նշեց նա:
Նյութի աղբյուրը: http://meganews.am/articles/11803
