Ներկայացնում ենք համեղ ռոլլերի պարզ բաղադրատոմս։
Քաղցր ռոլլերը ճապոնական ֆանտազիայի գլուխգործոցն է: Պահելով ռոլլերի ավանդական գլանաձևը ՝ միջուկը փաթաթում ենք շոկոլադե բլիթների մեջ, իսկ աղի միջուկի փոխարեն օգտագործում ենք քաղցր սերուցք, կաթնաշոռի զանգված կամ հյութալի հատապտուղներ: Մի քանի րոպե անց կստացվի տպավորիչ, անսովոր և աներևակայելի համեղ աղանդեր:
Իսկ հիմա բաղադրատոմսը.
Բաղադրիչներ
- ձու – 1 հատ
- շաքարավազ – 2 ճաշի գդալ
- կաթ – 250 մլ
- աղ – 1 պտղունց
- կակաո – 2-3 ճաշի գդալ
- ալյուր – 5-6 ճաշի գդալ, ըստ անհրաժեշտության
- կարագ – 30-50 գ (բլիթներին քսելու համար)
- բուսայուղ – տապակելու համար
Միջուկի համար
- կաթնաշոռ – 400-500 գ
- շաքարի փոշի – 2-4 ճաշի գդալ
- նարինջ- 1-2 հատ
- խնձոր – 1-2 հատ
- շոկոլադ – զարդարելու համար
Պատրաստման եղանակը
Ձուն հարել մի քանի րոպե, մինչև սպիտակուցն ու դեղնուցը լավ խառնվեն:
Ավելացնել կաթը, շաքարավազը, 1 պտղունց աղ և 2-3 ճաշի գդալ կակաո: Խառնել այնքան, մինչև դառնա միատարր զանգված:
Ստացված բաղադրիչներին ավելացնել մաղած ալյուրը: Պատրաստի խմորը դնել սառնարանում 15-20 րոպե:
Այնուհետև տապակը տաքացնել և քսել բուսայուղ: Ըստ տապակի տարողության լցնել պատրաստված խմորը և տապակել երկու կողմից:
Պատրաստի բլիթները տեղափոխել ափսեի մեջ և կարագ քսել:
Միջուկի համար
Կաթնաշոռին ավելացնել շաքարի փոշին: Ցանկության դեպքում կարելի է ավելացնել վանիլ կամ այլ համեմունքներ`ըստ ճաշակի:
Լցոնելու համար
Խնձորն ու նարինջը մաքրել և կտրել փոքր կտորների: Ամռանը կարելի է ավելացնել նաև ելակ:
Պատրաստի բլիթներին քսել կաթնաշոռի սերուցքը: Այնուհետև ծածկել և թողնել սառնարանում 2-3 ժամ, որպեսզի սառչի:
Սառեցված քաղցր ռոլլերը բաժանել մասերի, զարդարել ըստ ցանկության և տրամադրության:
Բարի ախորժակ
