Վերջին 3 օրերին Լոռիում կտրուկ ավելացել է վարակակիրների թիվը. մեծ մասը «Գլորիայի» աշխատակիցներն են

93

Վանաձորի «Գլորիա» կարի ֆաբրիկայի վարակակիր աշխատակիցների թիվն ավելացել է 22-ով։ Արդեն կորոնավիրուսի հաստատված 61 դեպք կա։ Լոռու մարզպետ Անդրեյ Ղուկասյանն «Ազատությանն» ասաց՝ այսօր ևս մեծ թվով աշխատողներ թեստավորվել են։ Ենթադրվում է, որ վաղը հաստատված դեպքերի թիվը կավելանա։

Մարզպետը չի բացառում, որ պարետի որոշմամբ ֆաբրիկայի աշխատանքը երեք օրով դադարեցնելու ժամկետները կերկարաձգվեն։ «Դա կախված է վաղվա տվյալներից»,- ասաց նա։ Ընդ որում, ֆաբրիկան աշխատողներ ունի թե՛ Վանաձորից և թե՛ հարակից համայնքներից.- «Այո, ունենք համայնքներ, որտեղ չէին արձանագրվել մինչ այս պահը դեպքեր, բայց արդեն այսօրվա դրությամբ ունենք: Սա արդեն իրական վտանգ է ներկայացնում վիրուսի տարածումն անկառավարելի դարձնելու առումով»:

Այսօր Լոռու մարզպետն ու ոստիկանության պաշտոնյաները դուրս էին եկել Վանաձորի փողոցներ շրջայցի՝ հետևելու՝ քաղաքացիներն ու տնտեսվարողները որքանով են պահպանում նաև բաց տարածքներում պարտադիր դիմակ կրելու և առևտրի կետերում ու բանկերում ֆիզիկական հեռավորություն պահելու պահանջները։

Ոստիկանության Տարոնի բաժնի պետ Վազգեն Թորոսյանն «Ազատությանն» ասաց՝ զգալի փոփոխություն կա նախկին օրերի համեմատ.- «Հուսով ենք, որ այս համավարակի դեմ միահամուռ ուժերով կպայքարենք և պատվով դուրս կգանք: Ինչքան հնարավոր է եղել, պայքարել ենք, մեր ուժերի ներածին չափով պայքարել ենք»: Հարցին` ինչո՞ւ է հիմա հնարավոր այս միջոցները կիրառել, իսկ մի քանի օր առաջ` ոչ, նա պատասխանեց.- «Հիմա պատասխանատվությունը բարձրացել է մարդկանց մոտ: Հիմա արդեն գիտակցեցին, որ դրությունն ավելի լուրջ է, ավելի շատ են հետներս համագործակցում, դրա համար արդյունքներն ավելի երևացող են»:

Փողոցներում այսօր քաղաքացիները դիմակներ հիմնականում կրում էին, բայց շատերը դրանք պահում էին ծնոտից ներքև կամ միայն բերանի վրա.- «Ստի վիրուս մարդ չկա, ոչինչ»:

Աղբյուրը՝ www.azatutyun.am

Շարունակություն