Խոշոր հրդեհ Երևանում. թռչնաֆաբրիկայում առաջացած կրակի դեմ պայքարում են մեծ թվով հրշեջներ ու ֆաբրիկայի աշխատակիցները. ծուխը տեսանելի է մի քանի կիլոմետրից. ՖՈՏՈՌԵՊՈՐՏԱԺ

5

Այսօր՝ հունիսի 26-ին, խոշոր հրդեհ է տեղի ունեցել Երևանում։ Ժամը 15։30-ի սահմաններում Արտակարգ իրավիճակների նախարարության փրկարար ծառայության 9-11 օպերատիվ կառավարման կենտրոն ահազանգ է ստացվել, որ հրդեհ է բռնկվել Շիրակի 43 հասցեում գործող թռչնաբուծական ֆաբրիկայում։ Ինչպես դեպքի վայրից հայտնում է ֆոտոլրագրող Գագիկ Շամշյանը, հրդեհի վայր են ժամանել մեծ թվով հրշեջ փրկարարներ, 4 մարտական հաշվարկ, ինչպես նաև 2 ջրատար։ Այս պահին հրշեջներն ու թռչնաֆաբրիկայի աշխատակիցները պայքարում են կրակի տարածման դեմ։

Ծուխը տեսանելի է մի քանի կիլոմետրից։ Ֆոտոլրագրողը հայտնում է, որ հրդեհաշիջման աշխատանքները ղեկավարում են Երևան քաղաքի փրկարարական վարչության պետի տեղակալ Զավեն Մելքոնյանը, Երևան քաղաքի փրկարարական ուժերի վարչության հրդեհաշիջման և փրկարարական աշխատանքների իրականացման բաժնի պետ Գարեգին Հակոբյանը: Հրշեջ-փրկարարների շնորհիվ նախ կանխվեց կրակի տարածումը այլ հատվածներ և այս պահին էլ կրակն ամբողջովին չեզոքացվեց: Ու հիմա հրշեջ-փրկարարները հետախուզական աշխատանքներ են կատարում կրակի այլ օջախներ հայտնաբերելու ուղղությամբ:

Օպերատիվորեն ժամանել են նաև Երևանի 1-03 շտապօգնության բժիշկների հերթապահ մի քանի խմբեր, ովքեր տեղում առաջին բուժօգնությունն են ցուցաբերել մի քանի հրշեջների, ովքեր ծխահարվել էին, իսկ 1 հրշեջի էլ տեղում բուժօգնություն ցուցաբերելուց հետո տեղափոխել են «Արմենիա» բժշկական կենտրոն: Շենգավիթ վարչական շրջանի ղեկավար Ռազմիկ Մկրտչյանի հանձրարականով հրշեջներին օգնության են հասել Շենգավիթի թաղապետարանի կանաչապատման ծառայողները՝ հրդեհի վայր ժամանելով ջրատար ավտոմեքենաներով, ովքեր ջուր էին հասցնում հրդեհի վայր:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

Լուսանկարները՝ Գագիկ Շամշյանի

© shamshyan.com https://shamshyan.com/hy/article/2020/06/26/1158320/