Ագային ժողովի փոխխոսնակ («Իմ քայլը») Ալեն Սիմոնյանը պատրաստ է պատասխանատվություն կրել երեկվա միջադեպի համար, եթե իրավապահ մարմիններն այդպես որոշեն։ Երեկ ուշ երեկոյան ուղիղ հեռարձակման ժամանակ հայտարարեց Սիմոնյանը, որն, ի դեպ, այս պահին էլ «Նաիրի» բժշկական կենտրոնում բուժում է ստանում։
Իշխանական ուժի բարձրաստիճան ներկայացուցիչը, այդուհանդերձ, ընդգծում է՝ դիմել է ինքնապաշտպանության.- «Հայաստանի Հանրապետությունում գոյություն ունի օրենք, և ես կրկնում եմ` ես պատրաստ եմ կրել պատասխանատվություն: Ես իրավունք ունեմ ինքնապաշտպանվելու, և ես այդ իրավունքից օգտվել եմ և օգտվելու եմ»:
Երեկ ծեծկռտուք էր տեղի ունեցել ԱԺ փոխնախագահ Ալեն Սիմոնյանի և «Ադեկվադ» կուսակցության ներկայացուցիչ Արթուր Դանիելյանի միջև։ Դանիելյանը, հրապարակելով իր արյունոտ քթի լուսանկարը, պնդում էր, թե հարձակվողը Սիմոնյանն էր։ Ազգային ժողովի փոխնախագահն ավելի ուշ պատմեց՝ Դանիելյանը սեռական բնույթի հայհոյանքներ է հնչեցրել` ի պատասխան իր բարևին։
«Ալեն Սիմոնյանն ի պատասխան իրեն հնչեցված հայհոյանքի` գլխով ջարդել է դիմացինի քիթը, որից հետո ծեծկռտուք է սկսվել: Ես պատրաստ եմ յուրաքանչյուր որոշման, որ իրավապահ մարմինները կկայացնեն»,- նշեց պատգամավորը:
Ոստիկանությունից «Ազատությանը» տեղեկացրին, որ նախապատրաստված նյութերն ուղարկվել են դատախազություն։ Այստեղից խոստացան օրվա ընթացքում մանրամասներ հաղորդել։
«Ադեկվադ»-ի ներկայացուցիչ Արթուր Դանիելյանի փաստաբան Տիգրան Աթանեսյանը հրաժարվեց «Ազատության» հետ զրուցել դեպքի շուրջ։ Ավելի վաղ փաստաբանն իր ֆեյսբուքյան էջում գրել էր. «Ալեն Սիմոնյանը իր ֆեյսբուքյան եթերից հետո պետք է հրաժարական տա ԱԺ փոխխոսնակի պաշտոնից, հակառակ դեպքում ինքնասիրական նկրտումները որևէ իրական հիմք և արժեք չունեն: Ինչ վերաբերում է բուն դեպքին, ապա այն իհարկե խեղաթյուրված է ներկայացվում: Ամեն դեպքում, առկա է և անհերքելի ՀՀ քրեական օրենսգրքի 112 կամ 113 հոդվածներով արգելված արարքը առերևույթ կատարելու փաստը: Գլխավոր դատախազը պարտավոր է միջնորդել Ազգային ժողովին, իսկ վերջինս պարտավոր է թույլատրել պատգամավոր Ա. Սիմոնյանին ենթարկել քրեական պատասխանատվության»։
Շարունակությունն այստեղ
