Իր չքնաղագեղ բնությունով հայտնի Սյունիքի մարզկենտրոն Կապանի գողտրիկ ու պատմական Խուստուփյան գեղատեսիլ վայրում, ծովի մակարդակից 1100մ բարձրության վրա տեղակայված է իր տեսակի մեջ եզակի հանգստայն վայր, որն իր այցելուներին հրամցնում է հաճելին, եզակին ու օգտակարը:
Լեռների պանորամային տեսարանով շրջապատված հանգիստ անկյունում, դուք կարող եք վայելել թարմ և մաքուր օդը: Հարմար տեղանքը, ժամանակակից ոճը և ջերմ մթնոլորտը հրապուրում են ճանապարհորդներին: Հանգստյան տունն առանձնանում է նաև ժամանակակից եվրոպական ինքնատիպ ճարտարապետական դիզայնով, գեղեցիկ տեսարանով, հարմարավետ համարներով և իհարկե բարեհամբույր սպասարկմամբ:
Ամռանը դուք կարող եք վայելել հոյակապ տեսարաններն, իսկ ձմռանը ջերմությունը՝ նստելով նաև մեծ խարույկի դիմաց:
Եթե որոշել եք կտրվել քաղաքային եռուզեռից, թոհուբոհից ու անցանկալի աղմուկից, ձեզ հարկավոր է լիարժեք հանգիստ, ապա «Նավասարդ Ռեզորթ»-ը սպասում է ձեզ:
Այստեղ մոռացվում է ողջ աշխարհը, ժամանակը կանգ է առնում…
Կանաչով պատված լեռներին նայելիս մի պահ խորիմաստ լռում ես…
«Լեգենդների արահետն», որը Գորիսի տարածաշրջանից ձգվում է մինչև Կապանի տարածաշրջան, Բաղաբուրջ թաղամասից զբոսաշրջիկներին տանում է 11-ից 17-րդ դարերի Ղուրչիկ գյուղատեղի: Հենց այստեղից էլ արահետը բարձրանում է 3201մ բարձրություն ունեցող Խուստուփ լեռնագագաթ։ Խուստուփ լեռան լանջին է թաղված հայ ռազմական, հասարակական գործիչ, փիլիսոփա Գարեգին Նժդեհը:
InterNews.info-ն զրույց է պատրաստել «Նավասարդ Ռեսորթի»-ի հիմնադիր, կապանցի գործարար Գարիկ Վեզիրյանի հետ, ով կբացահայտի տեղանքի պատմությունն իր ամբողջ չքնաղությամբ ու պատմականությամբ:
-Բարև Ձեզ Գարիկ, սկսենք սկզբից, երբ և ինչպես որոշեցիք հիմնադրել «Նավասարդ Ռեսորթ»-ը
– Բարև Ձեզ: Սկսեմ սկզբից: Հանգստյան գոտին անվանել եմ նախապապիս՝ Վաչագան գյուղից (ներկայում թաղամաս է Կապանի կազմում) սերող Նավասարդ Վեզիրյանի անունով։
Մինչև խորհրդային տարիներն այստեղ գյուղատեղի է եղել, և այդ տները կառուցել են մեր ազգի Վեզիրյաններն, որոնցից մեկն եղել է իմ նախապապը՝ Նավասարդ Վեզիրյանն, ով եղել է Գարեգին Նժդեհի վաշտապետը, Անդրանիկ Զորավարի զինակիցը:
Նրա և Նժդեհի հետ կապված պատմություններ, հոդվածներ շատ կան: Սարդարապատի հուշահամալիր, Հայոց ազգագրության թանգարանում, պահպանվել է Նավասարդ Հովակիմի Վեզիրյանի «Մոսին» հրացանը, սուրը և այլ իրեր:
37թ.-ին Նավասարդ Վեզիրյանին խառն իրավիճակի պատճառով ձեռբակալում են, ցավոք սրտի նա հենց բանտում էլ սպանվում է:
-Այդ տարածքում նրանք բնակվել են, այնպե՞ս չէ
-Այո, այո, այդտեղ իրենք ապրել են: Այնուհետև ժողովուրդն այդ հատվածից տեղափոխվել է հարակից Վաչագան գյուղ և այդտեղ խորհրդային տարիներին կառուցվել է Անտառապահի տունը՝ երկհարկանի շենքն: Այստեղ էին գալիս հանգստանալու շատ շատերն այդ թվում պաշտոնյաներ: Շատերին այստեղ էր բերում նաև առկա մատուռն, (մնացել է միայն խաչքարը) որը սրբատեղի է: Մինչև այսօր էլ վայրն ուխտատեղի է տեղացիների շրջանում, ովքեր այցելում են այստեղ՝ հիվանդ հարազատներին բժշկություն խնդրելու համար:
– Ինչպե՞ս ձեռք բերեցիք տարածքը
-2002թ.-ին, տարածքը վաճառքի ենթակա էր, հայրս մեծ դժվարությամբ կարողացավ ձեռք բերել այն, ինչը մեզ համար մեծ ուրախություն էր: Գնեցինք վերանորոգեցինք և բնակվեցինք: Եվ ահա խորհրդային տարիների Անտառապահի տունն այժմ Վեզիրյանների առանձնատունն է, ինչը մեծ պատիվ է մեր ընտանիքի համար:
Տանն կից առկա էր խաչքարն որը տեղահանված է, ու տապանաքար։ Թե՛ դրանք, թե՛ Ղուրչիկ գյուղատեղին ներառված են ՀՀ պատմության և մշակույթի անշարժ հուշարձանների ցանկում։
– Եռանկյունաձև տնակները կարծես հեքիաթից լինեն: Ե՞րբ որոշեցիք կառուցել
– 44-օրյա պատերազմից հետո մեր Կապանը դարձել էր մի տեսակ տխուր, բնակչության շրջանում նկատելի անորոշություն, տագնապ, տխրություն կար։ Սա նկատելով ես որոշեցի ինչ որ նոր բան անել: Եվ ահա միտք ծագեց հորս և պապիս վաղեմի երազանքն իրականություն դարձնել՝ մեր հարուստ բնություն ունեցող չքնաղագեղ Կապանում, Խուստուփ լեռան ստորոտում, այս պատմական վայրում հանգստյան գոտի ստեղծել: Այստեղ հետագայում կկառուցվի նաև թանգարան:
– Ձեր հայրը հասցրե՞ց տեսնել այս ամենը
– Ցավոք, հայրս մահացավ 2023թ.-ին, սակայն բարեբախտաբար հասցրեց տեսնել այս ամենը, չնայած որ անելիքները դեռ շատ են, քիչ քիչ կավելացնենք:
Հայրս շատ բաներ էր ասում, պատմում, այն ժամանակ երիտասարդ էի, այլ կերպ էի հասկանում, ճիշտ են ասում կյանքն առավել իմաստուն է դարձնում մարդուն:
Այժմ ամեն մի իրի արժեք յուրովի եմ հասկանում, արժևորում, ցանկանում եմ ընդլայնվել, և ինչպես վերը նշեցի նաև թանգարան կառուցել:
– Որքա՞ն տևեց շինարարությունը, գո՞հ եք արդյունքից
-Այո, ես և ընտանիքս շատ գոհ ենք: Արդյունքը նկատելի էր հենց առաջին օրվանից: Այս ամենին իր կարևոր մասնակցությունն ունի իմ ընտանիքը: Կառուցել սկսել եմ 2022թ.-ի մարտ ամսին, ավարտել ենք հուլիսի 5-ին: Շինարարությունը տևել է մոտ չորս ամիս։ Շինանյութը տեղափոխելու համար Կապանից օրական մոտ 8 անգամ բարձրանում էի այստեղ, և ահա արդյունքը: Քաղաքից հեռավորությունն ընդհամենը 5կմ է, Խուստուփ տանող ճանապարհին է: Երկհարկանի երեք տնակներից յուրաքանչյուրն ունի 51քմ տարածք, որն ունի կեցության համար անհրաժեշտ բոլոր հարմարությունները, բակում՝ լողավազան, մեծ ճոճանակ, խարույկ։ Յուրահատկություններից մեկն էլ այն է, որ երեք տնակներն էլ նայում են չքնաղ Խուստուփին։
-Ես գիտեմ, որ «Նավասարդ Ռեսորթ»-այցելում են ոչ միայն Կապանից, այլև աշխարհի տարբեր վայրերից
-Այո, մենք կանք շատ միջազգային հարթակներում և ունենք այցելուներ աշխարհի տարբեր անկյուններից: Ունենք նաև բարձր ցուցանիշ, ինչն ինձ շատ ուրախացնում ու պարտավորեցնում է:
-Ի՞նչ գնային փաթեթներ է Ձեզ մոտ, և ի՞նչ է ներառված
– Մենք փորձում ենք հրամցնել գնի և որակի լավագույն համադրությունը: Գնային համակարգը սկսում է օրը 40.000դրամից: Փորձում ենք հաճախակի ինչ որ ակցիաներով, անակնկալներով, նորություններով հանդես գալ: Անում ենք հնարավորինս հյուրերին գոհացնելու համար:
-Ի՞նչ կցանկանայիք ավելացնել
– Հայ ժողովրդին մաղթում եմ գնահատել այն, ինչ ունեն: Մեր Կապանն ունի չքնաղ վայրեր: Կապանում խաղաղ է, հանգիստ է, հրավիրում եմ բոլորին այցելել այստեղ, որտեղ հիանալի վայրեր կան տուրիզմի համար: Համեցեք, վստահ եմ կհիանաք մեր չքնաղ Կապանով:
– Պարոն Գարիկ, շնորհակալ եմ հաճելի, հետաքրքիր զրույցի համար: Իսկապես չքնաղ, պատմական վայր է: Բարգավաճեք էլ ավելի ու ավելի:
«Նավասարդ Ռեսորթ» կոնտակտներ
Հասցե՝ Սյունիքի մարզ, քաղաք Կապան, Բաղաբուրջ, Ղուրչիկ 171
(Viber/WhatsApp) Հեռ՝ +374 55 99 07 77
Ինսթագրամ
Ֆեյսբուք
Հեղինակ՝ Էմմա, Աննա
