Ս․ թ․ հուլիսի 10-ին, Ավ․ Իսահակյանի անվան Կենտրոնական գրադարանում, տեղի ունեցավ Նարեկ Գրիգորյանի «Դիվանագիտություն. ընդհանուր հիմունքներ» և «Միջազգային հարաբերություններ. տեսագործնական հարցեր» գիտահանրամատչելի ձեռնարկների շնորհանդեսը։
«Միջազգային հարաբերություններ. տեսագործնական հարցեր» ուսումնամեթոդական ձեռնարկում հեղինակն անդրադարձել է միջազգային հարաբերություններ հետազոտության առարկայի հիմնական թեմաներին և մատչելիորեն ներկայացրել է ոլորտի արդիական հարցեր և պատասխաններ: Գիրքը նախատեսված է բուհերի նեղ մասնագիտացող ուսանողության, ինչպես նաև լայն հետաքրքրություն ունեցող լսարանի համար:
«Դիվանագիտություն. ընդհանուր հիմունքներ» գրքում շարադրված են դիվանագիտություն առարկայի հիմնական բովանդակային թեմաները. այն ևս հասցեագրված է թե՛ նեղ մասնագիտական շրջաններին, թե՛ առավել լայն լսարանին: Գրքերը տրամադրվելու են մասնագիտական բուհերին, Հայաստանի և Արցախի գրադարաններին: Շնորհանդեսին ներկա էին գիտնականներ, քաղաքագետներ, արվեստագետներ։ Հեղինակին ներկայացրեց քաղաքագետ Մարգարիտա Պետրոսյանը։
Ողջույնի և շնորհավորանքի խոսքերով հանդես եկան Ավ․ Իսահակյանի անվան Կենտրոնական գրադարանի տնօրեն, ՀՀ մշակույթի վաստակավոր գործիչ Հասմիկ Կարապետյանը, դիվանագետ Արման Նավասարդյանը, քաղաքագետներ Ստեփան Գրիգորյանը, Կարեն Գալոյանը, Ռոբերտ Ղևոնդյանը և ոլորտի այլ մասնագետներ։ «Արմենուհի և Ղևոնդ Կուկունյանների անվան Նոր սերունդ» հիմանդրամի նախագահ Արփի Աճեմյանը խոսեց երիտասարդ մասնագետների պատրաստվածության կարևորության և դրանում ներդրումներ կատարելու առաջնահերթությունների մասին։ Ավարտին հեղինակն ավելի հանրամատչելի խոսեց դիվանագիտության մասին և շնորհակալություն հայտնեց ներկաներին։ ԳՐՔԵՐԸ ԿԱՐՈՂ ԵՔ ՁԵՌՔ ԲԵՐԵԼ «ԲՈՒԿԻՆՍԻՏ» և «ՆՈՅՅԱՆ ՏԱՊԱՆ» ԳՐԱԽԱՆՈՒԹՆԵՐԻՑ
