—Լյուսի, մի փոքր կպատմե՞ք ձեր երազանքի մասին։
—Դեռ վաղ տարքից սիրել եմ երգել և իմ երազանքն էր դառնալ հայտնի երգչուհի։ Իմ երազանքն իրագործելու համար ես ընդունվեցի Երգի պետական թատրոն։ ԵՊԹ-ում երկու տարի սովորելուց հետո ավարտեցի վոկալի բաժինը։ Ես մասնագիտությամբ լեզվաբան եմ, ավարտել եմ Եվրոպական կրթական տարածաշրջանային ակադեմիան։ Սիրում եմ լեզվաբանի իմ մասնագիտությունը, սակայն ավարտելուց հետո մտնելով դիմահարդարման ասպարեզ, զգացի, որ դա ինձ համար ավելի քան հոգեհարազատ է։
—Ինչու՞ ընտրեցիք հենց դիմահարդարի մասնագիտությունը։
—Դեռ մանկուց ես շատ եմ սիրել դիմահարդարվել և միշտ գողանում էի մայրիկիս դիմահարդարման պարագաները (Ծիծաղում է) ։ Տարիներ անց, երբ ձեռք բերեցի իմ սեփական դիմահարդարման պարագաները, առաջին փորձերս կատարեցի ընկերուհիներիս հետ։
—Ե՞րբ որոշեցիք սիրողական դիմահարդարումից անցնել պրոֆեսսիոնալի։
—Սկզբում ինձ օգնում էր համացանցը, որի շնորհիվ սկսում էի տիրապետել դիմահարդարման նրբություններին։ Կողքից լսելով բազմաթիվ դրական կարծիքներ՝ ոգեշնչվեցի այդ ամենից, որոշեցի սիրողական դիմահարդարումից անցում կատարել դեպի պրոֆեսսիոնալ դիմահարդարմանը։ Պրոֆեսսիոնալ դիմահարդարման կուրսը ավարտելուց հետո, անմիջապես անցա աշխատանքի, սակայն աշխատելու հետ մեկտեղ վերապատրաստվել եմ։
—Լյուսի, դիմահարդարումը բացի արտաքին գեղեցկությունից ի՞նչ է տալիս մարդուն։
—Կարծիքները տարբեր են ։ Դիմահարդարումը այն չէ, որ միայն գեղեցկացնում է արտաքինը, դիմահարդարումը փոխում է նաև մարդու ներաշխարհը, այն ունակ է փոխել կնոջ կերպարն ու ոճը և ավելացնեմ, որ սխալ դիմահարդարման դեպքում դու կարող էս քո տարիքից մի քանի անգամ ավելի մեծ կնոջ տեսք ստանալ։
—Ի՞նչ խորհուրդ կտաք սկսնակ դիմահարդարներին
—Ասեմ, որ ես ունեմ աշակերտներ, որոնք շատ հմտորեն տիրապետում են մասնագիտական նրբություններին և գաղտնիքներին, իսկ ինչը վերաբերում է խորհրդին, ես ուղղակի խորհուրդ կտամ նրանց, որ չհիասթափվեն և շատ աշխատեն իրենց վրա, քանի որ լինում են անկումներ։ Պետք է չհիասթափվել և անցնել առաջ։
—Եվ վերջին հարցը։ Ունե՞ք կյանքի կարգախոս և արդյո՞ք առաջնորդվում եք դրանով։
—Հետաքրքիր հարց էր (Ժպտում է) իհարկե ունեմ, <<ամեն բան հնարավոր է հավատացողի համար>> սա էլ իմ կարգախոսը։
Լրագրող՝ Նարեկ Դեմիրճյան
