Լոնդոնի «Արսենալը» չկարողացավ «Ատլետիկոյից» խլել Եվրոպա լիգայի եզրափակչի ուղեգիրը: Երեկ՝ մայիսի 3-ին, մրցակցի հարկի տակ «զինագործները» 0:1 հաշվով զիջեցին մադրիդյան թիմին:
Առաջին խաղում տանը ոչ-ոքի՝ 1:1 էին խաղացել, եւ ընդամենը 1 գոլ էր պակասում գոնե հանդիպումը լրացուցիչ ժամանակ տեղափոխելու համար, սակայն չկարողացան խփել այդ գոլը:
Լոնդոնցիները պարտվողի դերում հայտնվեցին առաջին խաղակեսի վերջում՝ ավելացված ժամանակում: Աչքի ընկավ Դիեգո Կոստան:
Հանդիպման մնացած հատվածում նոր գոլեր չարձանագրվեցին: Մադրիդցիները եզրափակիչ դուրս եկան՝ 2 խաղերի արդյունքում հաղթելով 2:1:
Հանդիպմանը մասնակցեց նաեւ վնասվածքից ապաքինված Հենրիխ Մխիթարյանը: Կիսապաշտպանի ծնկի վնասվածքը կրկնվել էր անցած հանգստյան օրերին կայացած «Մանչեստեր Յունայթեդի» դեմ խաղի ընթացքում, որում լոնդոնցիները զիջեցին 1:2:
Երեկ նա փոխարինման մտավ 68-րդ րոպեին: Խաղադաշտ մտնելուց մի քանի րոպե հետո էլ վտանգավոր հարված կատարեց, սակայն այն շեղ ընթացավ:
«Արսենալը» հիասթափեցրեց երկրպագուներին ոչ մի տիտղոս չնվաճելով ու կորցնելով հաջորդ մրցաշրջանում Չեմպիոնների լիգայում հանդես գալու իրավունքի համար պայքարելու վերջին հնարավորությունը:
Անգլիայի Պրեմիեր լիգայի առաջնությունում թիմն այս պահին 6-րդ է եւ միայն Եվրոպա լիգայում հաղթելով կարող էր մյուս մրցաշրջանում խաղալ Չեմպիոնների լիգայում:
Թիմի գլխավոր մարզիչ Արսեն Վենգերն էլ չի կարողանա բարձր նոտայով ավարտել կարիերան «Արսենալում»:
Առանց այն էլ տեւական ժամանակ է՝ խիստ քննադատության տակ է, երկրպագուներն էլ դժգոհ են նրանից, վերջում էլ այսպես: Երեկվա հանդիպումից հետո մասնգետը նշել է, որ շատ տխուր է խաղի ելքի պատճառով:
Источник` armtimes.com
