Հրաշքների շերտեր կան կյանքին շաղկապված, ամենուրեք, թափանցիկ, բայց գունավոր, հետքեր, արտացոլումներ, պարզապես մեր աչքերն ամեն ինչ չեն տեսնում, ու երբ Տէրը մեզ շնորհում է այդ երանգների լույսերը՝ դրանք վեհ նվեր են մեզ համար․․․
Նարեկ Հարությունյան
Հույսեր, հույզեր, ապրումներ, հասկանալի և շատ խորքային Էմոցիաներ, որոնք գրավում են իրենց գունային, լուսային խորությամբ։ Մտքի, պոետիկ պոռթկում, եզակիության արտացոլում, սրտի թաքնված խոսք․․․
Իրականության և երևակայության փոխկապակցված վերացական ձևեր․․․ Եզակի, պոտիկ ճամփորդություն, «երրորդ աչք» ես այսպես կբնութագրեմ Նարեկ Հարությունյանի «Ֆոտոաուրա» լուսանկարչական ալբոմ-գրքը։
Ինչպես նշեց Նարեկ Հարությունյանը՝
– Աստծուն փառք, գիրքն ուղղակի միջոց է հարազատներով հավաքվելու համար: Սերը հայրենիքի և մշակույթի հանդեպ ժառանգել եմ ծնողներից, որի լավագույն դրսևորումը «Նարեկացի» արվեստի միությունն է, որն արդեն 19 տարեկան է:
«Նարեկացի» արվեստի միությունում տեղի ունեցավ ՆԱՄ հիմնադիր Նարեկ Հարությունյանի «Ֆոտոաուրա» լուսանկարչական ալբոմ-գրքի շնորհանդեսը և ալբոմում տեղ գտած լուսանկարների ցուցահանդեսը:
Նարեկ Հարությունյանին շնորհավորելու էին եկել իր ընկերներն ու բարեկամները, որոնցից շատերի նկարները տեղ են գտել գրքում:
Գրքի հովանավորը նրա եղբայրն՝ Սարո Հարությունյանն է․ ով նշեց․
– Նարեկը «Նարեկացի» արվեստի միության բաբախող սիրտն է, խթանող ուժը: Նրա խոսքով՝ ազգապահպանության գործում յուրաքանչյուրը պետք է իր ներդրումն ունենա, Նարեկ Հարությունյանը դա անում է հայ մշակույթի պահպանմամբ և տարածմամբ: Նարեկը պետք է շարունակի, իր տաղանդի արտացոլումները, դրանով ուժ տալով ինքը մեզ՝ մենք իրեն։
Միջոցառման ընթացքում «Նովա» ժողովրդական նվագարանների անսամբլը կատարեց Արմեն Տիգրանյանի «Անուշ» օպերայից Սարոյի արիան (մեներգիչ՝ Արման Առաքելյան), Արա Գևորգյանի «Արցախ» և Կոստանդին Պետրոսյանի «Հայաստան» (մեներգիչ՝ Արման Առաքելյան) ստեղծագործությունները:
Անակնկալ կատարմամբ հանդես եկան Նարեկ Հարությունյանի զավակները՝ Նովա և Քնար Հարությունյանները:
Միջոցառման ավարտին բոլոր ներկաները ստացան լուսանկարչական ալբոմ-գրքի՝ իրենց օրինակը՝ հեղինակի ստորագրությամբ որպես նվեր։
Հեղինակ ՝ Էմմա Կարապետյան
