«Ուդուլի» տոլմայի համահայկական 11-րդ փառատոնին պատրաստվել է 193 մետրանոց տոլմա
Մի քանի տարի առաջ հայտնի ռուս փիլիսոփաներից մեկը, խոսելով այն մասին, թե ինչ ապագա կարող է ընտրել Հայաստանն իր համար նոր աշխարհակարգում, ասել է, որ Հայաստանը կարող է դառնալ փորձարարական «ցանցային» ազգային պետություն՝ առանց ինքնիշխան տարածքի։
Հայաստանի կառավարության քաղաքականությունը երեւում է ուղղված է դրան՝ քվազիպետություն՝ առանց որոշակի տարածքի, ազգային քաղաքականության, յուրատեսակ կրիպտոշուկա, որտեղ ամեն ինչ վիրտուալ է և իրական են միայն կանխիկ գումարը, տոլման ու փառատոնները։ Նման քվազիպետությունում բանակ պետք չէ, անվտանգությունը դառնում է ուրվական, իսկ ազգությունը նշանակություն չունի։
Նման պետություն տանող առաջին քայլը Արցախի հարցից ու ազգային խնդիրներից ու շահերից ազատվելն է ու ազգային քաղաքականության փոխարինումը «ժողովրդավարական զարգացումով», թեև նորմալ երկրներում ժողովրդավարությունը ազգային շահերը պաշտպանելու լավագույն ձևն է։
Համաշխարհային անվտանգության և խաղաղության բանալին ժողովրդավարությունն է։ Լեռնային Ղարաբաղի հակամարտությունն այս փուլում դեռ մարդու իրավունքների խնդիր է, ԵԽԽՎ նիստում ասել է իշխող Քաղաքացիական պայմանագրի ներկայացուցիչ Արուսյակ Ջուլակյանը։ «Ժամանակակից Եվրոպայի կողմից վաղուց մերժված կատեգորիաները, ինչպիսիք են պատմական արդարությունը, պատմական հողերը, միայն մարդկանց մոլորության մեջ գցելու, արտաքին միջամտության հնարավորություններ ստեղծելու միջոց են», ասել է նա։
Փորձեք որեւէ ժողովրդավարական երկրից խլել «պատմական հողերը», այնժամ կհասկանաք, թե որտեղ է ժողովրդավարությունը։ Ու մինչ Հայաստանը դեմ է «պատմական հողերին» և ազատվում է Արցախից, Ռուսաստանը Հայաստանի վիրտուալ սահմանի երկայնքով սահմանային ուղեկալներ է կառուցում՝ Հայաստանը վերածելով իրական բազայի, իսկ Անկարան ու Բաքուն պատրաստվում են ստանալ իրական միջանցք Հայաստանի վիրտուալ տարածքով։
Հայաստանի նախագահ Վահագն Խաչատրյանը նույնպես կարծում է, որ «պատմական հողերի» մասին խոսելու ժամանակը չէ։ «Մենք պետք է իրատես լինենք: Եթե դուք դա հայտարարում եք, որ Արցախը չի կարող լինել Ադրբեջանի կազմում, ապա կորցնում եք մանևրելու իրավունքը: Մենք պետք է կարողանանք տարբերել քաղաքականությունն ու դիվանագիտությունը պոպուլիզմից և հրապարակային հայտարարություններից», ասել է Խաչատրյանը դեմքի խելացի արտահայտությամբ, հանրային հեռուստատեսության եթերում։
