ԱԺ «Քաղաքացիական պայմանագիր» խմբակցության պատգամավոր Արմեն Խաչատրյանն այսօր խորհրդարանում լրագրողների հետ զրույցում պատասխանելով Պաշտպանության նախարարությունում սպասվող փոփոխություններին և, թե ինչ նպատակով է ԳՇ պետը դառնալու նախարարի առաջին տեղակալը հարցերին, նախ ասաց, որ Գլխավոր շտաբ և նախարարություն փոխհարաբերությունները չհաջողվեց ամբողջապես կարգավորել և հստակեցնել, ուստի այդ պատճաոռվ որոշվեց, որ ԳՇ պետը դառնալու է նախարարի առաջին տեղակալը:
«Ինչպիսի կարգավորումներ էլ մտցնում էին, այդուամենայնիվ շատ մեծ էր անհատական գործոնը, թե ով է նախարարը և ով՝ շտաբի պետը, ինչն այդպես չպետք է լինի։ Ինստիտուցիոնալ կառույցներում մաքսիմում պետք է անհատական հատկանիշները քիչ դեր խաղան, և մեր պարագայում ինչը կար առ այսօր, բավականին բարձր դեր էր խաղում, թե ով կլինի գլխավոր շտաբի պետը և ով՝ նախարարը։ Մենք, և՛ քառօրյա պատերազմի ժամանակ, և՛ 44-օրյա պատերազմի ժամանակ այդ բացերը լավ ի հայտ եկան, երբ ԳՇ-ն կարող էր մի որոշում կայացնել, իսկ նախարարը մի շարք որոշումների կայացումից դուրս է մնում։ Կարծում ենք, որ բանակում միակենտրոն վերահսկողությունն առհասարակ վատ բան չէ»,- նշեց Արմեն Խաչատրյանը։
Նա նաև ընդգծեց, որ ԳՇ պետի լիազորություններն ավելանում են, երբ նա դառնում է նախարարի տեղակալ։
«Նա որոշակի լիազորություններ է ունենալու նախարարության որոշակի կառույցների նկատմամբ, ինչն այս պահի դրությամբ Գլխավոր շտաբի պետը չունի։ Մենք ավելացնում ենք նրա լիազորությունները, բայց նաև փորձում ենք այդ իրավական անջրպետը, որը միշտ լինում է՝ ԳՇ-նախարարություն, և ինչը շատ վառ է արտահայտվում հատկապես արտակարգ իրավիճակում, բացառում ենք, որպեսզի նման անջրպետ լինի։ Իհարկե, ուսումնասիրվել է նաև միջազգային փորձը, տեղայնացվել է նաև մեր պայմաններին։ Այս ամենի արդյունքում կայացվել է նման որոշում»,- շեշտեց Արմեն Խաչատրյանը։
Հարցին՝ մարտական գործողությունների ժամանակ խնդիրներ չե՞ն առաջանալու, Արմեն Խաչատրյանն ասաց, որ մարտական գործողություններ վարելու է Գլխավոր շտաբի պետը։
«Նախարարի գործառույթը նման պայմաններում ապահովելն է այն ամբողջ գործիքակազմը, հնարավորությունները, թիկունքային ռեսուրսները, բանակի համար անհրաժեշտ ամեն ինչ, որպեսզի բանակը, Գլխավոր շտաբը կարողանա իր առջև դրված խնդիրները լուծել։
ԳՇ պետին մենք նաև ազատել ենք կոմերցիոն գործունեություն իրականացնելուց»,- եզրափակեց Արմեն Խաչատրյանը։
