ԱՄՆ-ը կոչ է անում Հայաստանի իշխանություններին զսպվածություն ցուցաբերել, իսկ ցուցարարներին՝ զերծ մնալ բռնությունից եւ հարգել օրենքի գերակայությունն ու ժողովրդավարությունը։ Այս մասին հայտարարել է ԱՄՆ Պետդեպարտամենտի խոսնակ Նեդ Փրայսը` մեկնաբանելով վարչապետ Նիկոլ Փաշինյանի հրաժարականի պահանջով բողոքի ակցիաները, տեղեկացնում է news.am-ը։
«Ինչ վերաբերում է Հայաստանում բողոքի ակցիաներին, ապա, ինչպես գիտեք, անցյալ շաբաթ մենք ռազմավարական երկխոսություն ունեցանք հայկական կողմի հետ։ Եվ հենց այս ֆորումում մենք վերահաստատեցինք մեր փոխադարձ հավատարմությունը Հայաստանի ժողովրդավարական զարգացմանը եւ ԱՄՆ-ի աջակցությունը Հարավային Կովկասում կայուն խաղաղությանը:
Մենք կարծում ենք, որ խաղաղ ցույցերը բաց քաղաքական համակարգի մի մասն են։ Մենք լիովին աջակցում ենք խոսքի հիմնարար ազատություններին եւ խաղաղ հավաքներին: Մենք խրախուսում ենք մարդկանց խաղաղ ճանապարհով արտահայտել իրենց կարծիքը։ Մենք իշխանություններին կոչ ենք անում զսպվածություն դրսեւորել եւ կոչ ենք անում ցուցարարներին զերծ մնալ բռնությունից եւ հարգել օրենքի գերակայությունն ու ժողովրդավարությունը Հայաստանում»,-ասել է Փրայսը։
