Բրյուսելում Փաշինյան-Միշել-Ալիև հանդիպումից հետո Արարատ Միրզոյանը մեկնել է Մոսկվա։ Հայ «ընկերոջ» հետ ասուլիսին Սերգեյ Լավրովն անմիջապես անցավ հարձակման և Փառուխում տեղի ունեցած վերջին իրադարձությունների մեջ մեղադրեց հայկական կողմին։ «Խաղաղապահներին պատասխանատվության կանչելու և ծառայողական քննություն իրականացնելու մասին կոչերը չեն արտացոլում Հայաստանի բնակչության ու ղեկավարութան իրական վերաբերմունքը այն հսկայական դերին, որն ունեն ռուս խաղաղապահները այս տարածաշրջանում կայունություն ապահովելու տեսակետից», ասել է Լավրովը։
Լավրովին դուր չի եկել, որ Երևանը որոշել է իրերն իրենց անուններով կոչել։
Լավրովի պլանն Արցախում իրականացվեց, բայց դիվանագիտության մեջ նրա «ձեռքբերումները» միջազգային լեգիտիմություն չստացան։ Այժմ Լավրովը փորձում է կանխել «այլընտրանքային» բանակցությունները։ Նա հայտարարել է, որ ԱՄՆ-ը և Ֆրանսիան չեն ցանկանում աշխատել Ռուսաստանի հետ Մինսկի խմբում, և «չգիտեմ, թե ինչ կլինի այս խմբի հետ ապագայում»։ Հետո անմիջապես զանգել է Բաքվի իր գործընկեր Բայրամովին և նրա հետ խոսել եռակողմ ձևաչափի մասին։
Արարատ Միրզոյանն իր հերթին հայտարարել է. «Ես ունեմ այլ տեղեկություններ։ Նկատի ունենալով այն կոնկրետ ազդակները, որոնք ես եմ ստացել համանախագահող այլ երկրներից, ես ցանկանում եմ հաստատել հետևյալը․ միջազգային հանրությունը շարունակում է ԼՂ հիմնախնդրի կարգավորումը տեսնել ԵԱՀԿ Մինսկի խմբի համանախագահության մանդատի շրջանակներում»։
«Եթե ԱՄՆ-ը և Ֆրանսիան պատրաստ են զոհաբերել հայկական կողմի շահերը այս դեպքում, դա նրանց ընտրությունն է», ի պատասխան ասել է Լավրովը։ Նա ընդգծել է, որ Մոսկվան հավատարիմ է այն պայմանավորվածությունների կատարմանը, որոնք եղել են եռակողմ ձևաչափով Ռուսաստանի, Հայաստանի և Ադրբեջանի ղեկավարների միջև։
Ավելին, նա այդ մասին հայտարարել է Հայաստանի անունից՝ նշելով. «Մեր գործընկերները հաստատել են, որ Ռուսաստանի, Հայաստանի, Ադրբեջանի ղեկավարների որոշումը, որ սահմանազատման հանձնաժողովը լինելու է երկկողմանի՝ ռուսական կողմի խորհրդատվական մասնակցությամբ, մնում է ուժի մեջ։ «Եվ ոչ միայն այն պատճառով, որ մենք ունենք Գլխավոր շտաբի քարտեզներ»,- ասել է Լավրովը։
Հայաստանի ղեկավարությունը Բրյուսելում իսկապե՞ս հաստատել է իր հավատարմությունը եռակողմ հայտարարություններին, Մինսկի խմբի ձևաչափով բանակցությունների մերժմանը և «Գլխավոր շտաբի քարտեզների համաձայն» սահմանազատմանը։
