«Ազատություն» «Ֆեյսբուքյան ասուլիս» հաղորդման ընթացքում օգտատերերի հարցերին պատասխանեց Տարածքային կառավարման և ենթակառուցվածքների նախարար Սուրեն Պապիկյանը:
Ստորև ներկայացնում ենք հաղորդումից մեկ հատված.
«Ազատություն». – Ասել էիք, որ կորոնավիրուսի համաճարակի այս պայմաններում, երբ արտագնա աշխատանքի մեկնողները չեն կարող իրենց աշխատանքին անցնել արտերկրում, այստեղ կարող են շինարարական աշխատանքներում ներգրավվել, տվյալներ ունե՞ք, թե քանի մարդ է այդ կերպ աշխատանք գտել:
Պապիկյան. – Այս պահին որևէ թիվ հրապարակել չեմ կարող, ընդ որում, ես մի կարևոր հանգամանքի մասին եմ ուզում նշել՝ նախարարությունը, մարզպետարանները և որևէ պետական մարմին իրավասու չէ կապալառու ընկերությունների աշխատողի ու գործատուի միջև բացի նրանց միմյանց հետ կապ հաստատելը այլ կերպ միջամտել: Այսինքն՝ իմ կողմից արած հայտարարությունից հետո մարզպետարանների էջերով հայտարարություններ են տարածվել՝ խնդրելու, որպեսզի այն մարդիկ, ովքեր նախկինում գնում էին արտագնա աշխատանքի, հիմա իրենց տվյալները, մասնագիտական կարողությունները փոխանցեն մարզպետարաններին, որպեսզի հիմա և առաջիկայում մարզպետարանները դրանք տրամադրեն կապալառու ընկերություններին՝ առաջարկելով, որպեսզի նրանք այդ մարդկանց հետ ընդհանուր հայտարարի գան, աշխատանքային պայմանագիր ստորագրեն և կարողանան մինչ տարվա վերջ այդ մարդկանց աշխատանքով ապահովել:
«Ազատություն». – Այսինքն մարզպետարանի աշխատակիցները, կապալառուները իրենք չեն փնտրելու գտնելու այդ աշխատակիցներին, մարդիկ իրենք պետք է հետաքրքրվեն, գտնեն ու աշխատանքի անցնեն:
Պապիկյան. – Կապալառուն, բնականաբար, իր շահերի, կարիքների շրջանակներում այդ աշխատողերին փնտրելու է: Մենք պարզապես հավելյալ հարթակ ենք ստեղծել, հավելյալ հնարավորություն, որպեսզի կապող օղակ հանդիսանանք շինարարի՝ աշխատողի և գործատուի միջև:
«Ազատություն». – Օգտատերերից մեկը հարցնում է՝ քանի՞ տոկոսով են կատարվել 2019 թվականի կապիտալ շինարարությունը և այս պահին 2020-ի համար նախատեսված գումարների քանի՞ տոկոսն է ծախսվել, ի՞նչ լուծումներ եք տեսնում կապիտալ ծախսերի թերակատարման քրոնիկ խնդիրների համար, հնարավո՞ր է ստեղծել թափանցիկ մեխանիզմ, որով քաղաքացիները կարող են կատարվածի մասին համապարփակ տեղեկատվություն ստանալ՝ համաժամանակյա կամ հստակ պարբերականությամբ:
Պապիկյան. – Իրականում այդ ամենը բավականին հասանելի է բոլորին, որովհետև եթե քաղաքացին կամ մեր գործընկեր հայրենակիցը քաջատեղյակ է պետական գնման գործընթացին և շինարարական աշխատանքի ընթացակարգի բյուջեով նախատեսված աշխատանքներին, ապա նրա համար պետք է պարզ լինի, որ մենք ունենք եռամսյակներով նախատեսված գումարներ: Սովորաբար շինարարական աշխատանքները, հաշվի առնելով եղանակային պայմանները, մեկնարկում են երկրորդ եռամսյակի վերջին:
Աղբյուրը՝ www.azatutyun.am
