Արդեն 3 տարի կինոկենտրոնի կառավարումը ուզուրպացրած և ապաշնորհ կառավարմամբ <<ԿԻՆՈՊՐՈՑԵՍՆԵՐԸ>> (բառը կինոկենտրոնի ժ/պ տնօրեն Շ. Միրզախանյանի հեղինակային խոսքն է լրագրողին տված հարցազրույցում) բոլոր առումներով տապալած, ընդամենը տեղապահի կարգավիճակով կինոչինովնիկը բարբաջում է ՏավուշTV-ի հետ <<հուշագիր>> ստորագրելու և կինոժառանգության <<նմուշները>> սահմանամերձ գյուղերին հասանելի դարձնելու մասին, երբ Youtube-ում վաղուց բոլոր հայկական ֆիլմերը՝ թե՛ նոր, թե՛ հին, թե՛ անիմացիոն, անվճար հասանելի են աշխարհի բոլոր ծայրերում: Իսկ այն, որ այդ նմուշների հիմանյութ կինոժապավենային տարբերակները, որոնք կինոկտավների եզակի նմուշներ են՝ մշակութային հարստություն, հայ ազգի պատմությունն ու հանրային սեփականությունը, Ժ/պ-ի երեք տարվա կառավարման ընթացքում կինոժառանգության պահպանման համար միակ ծախսը այն է եղել, որ վերջերս կողպեք է գնել ու կողպել ավերակների վերածված ֆիլմադարանի դուռը, որ հանկարծ ոչ ոքի հասանելի չդառնա ու ջրի երես դուրս չգա, թե ինչպես կինոկենտրոնը, ունենալով կինոժառանգության պահպանման համար 7-8 միլն. դրամ ամենամյա պետական հատկացումներ, աղբի, փոշու, մկնակեղտի, հակահիգենիկ և հակասանիտարական պայմաններում, ամռանը օձերի ու կարիճների ապրելատեղի վերածված ֆիլմադարանում պահպանում է ազգային կինոժառանգությանը:
Մշ. նախարարությունը, որը կինոկենտրոնի հիմնադիրն է և ոլորտի պետական վերահսկողությունն իրականացնողը, ի դեմս փոխնախարար Արա Խզմալյանի, բազմիցս հրապարակավ հայտարարել է, որ չի խառնվում կինոկենտրոնի ներքին գործերին, մինչդեռ իրականում անվերապահորեն հավանության է արժանացնում ժ/պ-ի դիլետանտ ու ապաշնորհ կառավարումը՝ անտեսելով իրեն մոլորության մեջ գցող, իրականության հետ առճակատվող աղաղակող փաստարկները:
Վերջերս պարոն փոխնախարարը հաստատեց նաև, որ հավանության է արժանացրել տնօրենի ժ/պ -ի առաջարկած ոլորտի հետ աղերս չունեցող, անտրամաբանական կառուցվածքային փոփոխությունը, որտեղ կինոժառանգության բաժինը նկարագրող հաստիքացուցակից երևում է, որ կինոժառանգության պահպանության համար ռազմավարություն, մասնագիտական մոտեցում, առավել ևս մասնագետների ներառություն չկա, ընդամենն ուռճացրած, անկապ անվանումներով և անկապ գործառույթային պահանջներով հաստիքացուցակ է: Մինչդեռ ժ/պ-ն փոխնախարարին մոլորեցնելով՝ հավատացրել է նրան ժամանակակից կինոլաբորատորիա ստեղծելու իր բարբաջանքով: Ոլորտին չտիրապետող մարդը միայն կարող էր հավատալ, որ կինոժապավենների թվայնացման, վերականգման, պահպանման և սերունդներին փոխանցման համար իր չգիտելիքներով, աղքատիկ ֆինանսական կարողություններով, գլխին տանիք չունենալով ու մասնագիտականից կիլոմետրերով հեռու ոլորտի ղեկավարը կարող է Հայաստանում հիմնել կինոստեղծագործությունների թվայնացման և վերականգման լաբարատորիա:
Մշ. նախարարությանը ԱՀԱԶԱՆԳ ԵՄ ՀՆՉԵՑՆՈԻՄ՝
ՔԱՆԻ ԴԵՌ ՎԵՐՋՆԱԿԱՆՈՐԵՆ ՉԵՆՔ ԿՈՐՑՐԵԼ Հ.Բեկնազարյանի անվան <<Հայֆիլմ>> կինոստուդիայի արտադրության ոսկե ֆոնդի մոտ 300 անուն գեղարվեստական ֆիլմերի և մոտ 100 անուն մուլտֆիլմերի եզակի ֆիլմապատճենները, փրկեք Շուշանիկ Միրզախանյանի ԿՈՂՊԱԾ ՖԻԼՄԱՖՈՆԴԸ:
Հայ կինոյի պատմությունն աղետալի վիճակում է հայտնվել տգետ ու ապաշնորհ կառավարման արդյունքում: Վերանայեք ոլորտի կադրային քաղաքականությունը: Պետությունը ապաշնորհների պառճառով ահռելի ֆինանսական կորուստների փաստի առջև է կանգնած և շարունակվում է դեռևս ոլորտի կործանարար քաղաքականությունը:
P.S. Հարգելի պարոն փոխնախարար, Ձեր հավանությանն արժանացած և Ձեր ձեռամբ կինոկենտրոնի կառուցվածքային փոփոխության առիթով այսօր առաջին աշխատավարձի կապակցությամբ հավանաբար խրախճանք է կազմակերպվելու: Եթե Ձեզ էլ են հրավիրելու, առիթը բաց մի թողեք, գնացեք կինոկենտրոն Ձեր աչքերով տեսեք և համոզվեք կինժառանգության աղետալի և կործանվող իրականության պատկերը: Ձեզ էլ հո չեն մերժի կողպված դռնից ներս մտնելը:
Nikol Pashinyan / Նիկոլ Փաշինյան, Arayik Harutyunyan, Ara Khzmalyan, Ararat Mirzoyan, Anna Kostanyan, Մխիթար Հայրապետյան / Mkhitar
Հեղինակ՝ Սաթիկ Ստեփանյան
