International Tv –ին, շարունակում է Ձեզ ներկայացնել «20 հարց» շարքը: Այս անգամ մեր հյուրն է «Նարեկացի» արվեստի կենտրոնի հիմնադիր Նարեկ Հարությունյանը:
1.-Երբ և ինչ նպատակով է հիմնադրվել «Նարեկացի» արվեստի միությունը
-Մշակույթի հետ կապը ինձ մոտ դեռ մանկուց է եղել։ Փոքրուց թատրոն, կինո… միշտ տենչը մեջս եղել է: Հայրս միշտ պահել է Հայաստանի հետ կապը: Եկավ մի պահ և ես հասկացա, որ կան տաղանդներ որոնց ես պետք է աջակցեմ:
Առաջին մարդկանցից էին Արթուր Մեսչյանը, Ռուբեն Հախվերդյանը, նրանց հանդիպելուց ես հասկացա, որ պետք է անեմ ամեն հնարավորը և արեցի։
Ինչպես նաև շատ մեծ է կապը հորս հետ: Նա արվեստասեր մարդ էր ու հաջողակ բիզնեսմեն: Հայրս աջակցում էր արվեստագետներին, իսկ «Նարեկացին» այդ ամեն ինչի շարունակությունն է: 2000թ․-ին հենց այս ոգով է հիմնադրվել «Նարեկացի» արվեստի միությունը ԱՄՆ-ում իմ և ավագ եղբորս` Սարո Հարությունյանի, Հարկո Ինսենթիվզ ընկերության www.harcoweb.com և իհարկե իմ լուսահոգի հոր` Կարապետ Հարությունյանի հիմնական աջակցությամբ:
Շատ բան կարելի է ասել, հակիրճ, այսպես ձևակերպեմ՝ «Նարեկացի» արվեստի միությունը (ՆԱՄ) բարեգործական հիմունքներով գործող և շահույթ չհետապնդող հասարակական կազմակերպություն է:
Կրելով սուրբ Գրիգոր Նարեկացու անունը և առաջնորդվելով հոգևորի խորհրդով՝ միությունը կոչված է ծառայելու հայ արվեստին, մշակույթին և հոգևոր արժեքներին: 2004 թվականին միությունն իր դռներն է բացել Երևանում և 2006 թվականին՝ Շուշիում:
ՆԱՄ-ում բոլոր միջոցառումները կազմակերպվում են միության կողմից բացառապես անվճար հիմունքներով:
«Նարեկացի» արվեստի միության Երևանի կենտրոնում գործում են «Նարեկացի» ժողովրդական նվագարանների նվագախումբը, «Նովա» ժողովրդական նվագարանների անսամբլը, «Նժդեհ» ազգագրական երգի, պարի խումբը և նկարչության մանկական դասարանը: Մեր հատուկ ուշադրության կենտրոնում են հաշմանդամություն ունեցող մարդիկ, տաղանդավոր երեխաները, մարզերի երիտասարդ արվեստագետները: Բոլոր միջոցառումների մուտքը միշտ ազատ է:
Սա մի կառույց է, որտեղ գնահատվում է արվեստագետը: Առանց մշակույթի մենք ոչինչ ենք:
2.– Ո՞րն է կյանքի Ձեր նշանաբանը:
– Ծառայել Աստծուն և ազգիս
3. – Ամենասիրած կամ վերջին կարդացած գիրքը:
– Համշենահայ գրող՝ Զորիկ Քեշիշյանի «Մահապարտների պարը»
4.- Տաղանդավոր ծնվում ե՞ն, թե՞ դառնում:
– Աստվածատուր է, ծնվում են և իհարկե կարելի է զարգացնել կյանքի ընթացքում:
5.- Ի՞նչ սկզբունքներ ունես կյանքում:
– Լինել հավատքով, ապրել հնարավորինս Աստծո օրենքներով և հնարավորինս աջակցել ազգիս: Պետք է գիտակցել, որ ամենակարևոր արժեքները նյութական չեն:
6.- Ո՞րն է մանկության Ձեր լավագույն հիշողությունը։
– Առաջին անգամ, երբ եկա Հայաստան ցանկանում էի ինտեգրվել տղաների ֆուտբոլին, նրանք ասեցին, որ ես պետք է ուժ կպնեմ՝ ուսը հավասարացնելով գետնին: Բերեցին ինձանից բարձրահասակ մեկին, ցանկությունս այնքան մեծ էր, որ ես հաղթական դուրս եկա։
7․– Եթե հնարավորություն ունենայիք Ձեր կյանքը վերսկսելու, ի՞նչը կփոխեիք:
– Շատ բան կփոխեի, բայց կան բայցեր… ինչ որ բան լինում է ինչ որ բանի համար:
8․– Ճակատագիր կա՞:
– Այո, պատահական ոչինչ չի լինում կյանքում։ Եվ պետք է հիշել, որ մեզ հետ կատարված ամեն ինչի համար մեղավորը նախ և առաջ մենք ենք։
9.– Որո՞նք են Ձեր բնավորության դրական ու բացասական գծերը:
– Միամիտ վստահում եմ․․․ դրականը թողնեմ դիմացինիս։
10.- Նախագահ դառնալու դեպքում առաջին հերթին ի՞նչ կանեիք։
-Քաղաքական դաշտը կեղծիք է բոլորը դիմակներով են: Ցանկություն չկա: Կցանկանայի Կոմիտասյան ոգի և Նժդեհյան շունչ, կցանկանայի ապագա սերնդում նման ղեկավար տեսնել:
11.–Եթե տեսնեիր Աստծուն, ի՞նչ կասեիր
-Ներողություն կխնդրեի
12. –Ո՞րն է Ձեր ամենամեծ նվաճումը:
-Ինձ թվում է դեռ չեմ հասել գագաթնակետին:
13․–Ի՞նչ հմտությունն եք համարում էական, որպեսզի այն ունենան բոլոր մարդիկ:
-Հավատք, հույս, սեր, արժանապատվություն:
14․–Եթե անմահ լինեիք, ի՞նչ կանեիք:
-Չենք լինի: (ժպտում է)
15.–Ի՞նչ հանգամանքներում կարելի է արդարացնել սուտը:
-Անմեղի կյանքը փրկելու:
16.-Եթե ինչ–որ մեկը պատմեր Ձեր կյանքը, ո՞վ կուզեիք, որ պատմողը լիներ:
-Հայ երաժիշտ կոմպոզիտոր, Դանիել երաժիշտը: Բացառիկ մարդ, ով նաև «Նարեկացի» արվեստի միության գեղարվեստական խորհրդատուն է։
17․–Ի՞նչ եք կարծում, ո՞րն է ձեր ամենամեծ թերությունն ու ամենամեծ առաքինությունը:
-Բարությունն ու Նարեկացին․․․
18․–Ումի՞ց եք շնորհակալ Ձեր կյանքում:
Աստծուց և ծնողներիցս
19.-Ի՞նչ նորություններ են սպասվում:
– Իր գործունեության ընթացքում ՆԱՄ-ը կազմակերպել և կյանքի է կոչել մի քանի տասնյակ հատուկ նախագծեր, ամեն տարի իրականացնում է 300-ից ավելի համերգներ, ցուցահանդեսներ, դասախոսություններ, վարպետության դասեր, ֆիլմերի ցուցադրություններ և այլն, լույս է ընծայել բազմաթիվ արժեքավոր հրատարակություններ, համագործակցում է հայ և օտարերկրացի շատ ստեղծագործողների, ինչպես նաև դեսպանատների հետ:
Շարունակվում են մեր միջոցառումները: Լինում և կլինեն նորանոր նորություններ:
20.- Ի՞նչ կցանկանայիք ավելացնել:
– Աղոթենք մեր ազգի համար, ապրենք Աստծո օրենքներով արժանի լինենք նրա օրհնությանը: Շնորհակալություն։
