Հունիսի 9-ին ՀՀ նկարիչների միությունում միանգամից մեկտեղվեց մշակութային նշանակալի երկու իրադարձություն՝ կայացավ Չարլզ Դիքենսի «Մեր Տիրոջ՝ Հիսուս Քրիստոսի կյանքը» գրքի շնորհանդեսը, իսկ «Արա Սարգսյան» ցուցասրահում բացվեց գեղանկարիչ Մայիս Մխիթարյանի աստվածաշնչյան թեմաներով կտավների ցուցադրությունը, որը փաստորեն գրքի ձոներգի օրգանական շարունակությունն էր։ Նկատենք, որ Մայիս Մխիթարյանը միաժամանակ գրքի պատկերազարդողն է։ Մշակութային հիշյալ զուգորդումներից զատ օրը խորհրդանշական էր նաև նրանով, որ համընկել էր մեծ բրիտանացու մահվան տարելիցի հետ։
Չարլզ Դիքենսի այս ստեղծագործությունն իր գրադարանում ունենալու համար հայ ընթերցողը պարտական է Կարեն Գևորգյանին, ում թարգմանությամբ էլ ծնունդ է առել այն։ Գիրքը լույս աշխարհ է եկել Արագածոտնի թեմի առաջնորդ Տ․ Մկրտիչ եպիսկոպոս Պռօշեանի օրհնությամբ, մեր իրականությունում բազմաթիվ բարեգործություններով հայտնի Գրիգոր Մովսիսյան-Նաիրա Կարապետյան ամուսնական զույգի մեկենասությամբ։
Ընթերցասեր հասարակությանը տեղեկացնենք, որ երևելի այս ստեղծագործությունը հանճարեղ անգլիացին թեպետ գրել է իր երեխաների համար, սակայն իր նշանակալիությամբ, հասարակական հնչեղությամբ գործն այս վաղուց պատռել է ժամանակային արգելքը՝ դառնալով հարյուր միլիոնավոր հավատապաշտ ընթերցողների սեղանի գիրք։
Հունիսիննյան մշակութային հիրավի այս առանձնանալի երևույթի համար մենք գրքի թարգմանչից, մեկենասներից զատ պիտի շնորհակալ լինենք ՀՀ նկարիչների միությանն ու նրա նախագահ Սուրեն Սաֆարյանին, որ համարձակ գնում է մշակութային իրողությունների համատեղման ճանապարհով, գործը գլուխ բերած, դրա կայացմանը մեծապես աջակցած Արագածոտնի թեմի առաջնորդ Տ․ Մկրտիչ եպիսկոպոս Պռօշեանին, իր մեծ հայրենակցի հիշատակը հարգած, միջոցառմանը մասնակցած ու սրտի խոսք ասած, Հայաստանի Հանրապետությունում Մեծ Բրիտանիայի և Հյուսիսային Իռլանդիայի Միացյալ Թագավորության արտակարգ և լիազոր դեսպան Ջոն Գալագերին, ում համար Հայաստան-Անգլիա մշակութային այս կապը երկու երկրների հոգևոր միասնության մի նոր արտահայտություն էր, ապագային միտված պատգամ։
Հեղինակ՝ Մարտին Հուրիխանյան
