Վարչապետ Նիկոլ Փաշինյանն այսօր Ազգային ժողովում հանդիպում է ունեցել «Լուսավոր Հայաստան» խմբակցության ղեկավար Էդմոն Մարուքյանի հետ՝ վերջինիս նախաձեռնությամբ։
Հանդիպման ավարտին վարչապետը հրաժարվեց պատասխանել լրագրողներին հարցերին․ – «Ես ներողություն եմ խնդրում, ես հարցերին չեմ պատասխանում»։
Վարչապետի հետ հանդիպումից հետո ընդդիմադիր խմբակցության ղեկավարն ասաց, թե Արցախի հիմնախնդրի վերաբերյալ շահարկվող մտահոգությունները փարատված են։
Ներքաղաքական որևէ հարցի, հավաստիացրեց Մարուքյանը, անդրադարձ չի եղել։ Իսկ իշխանական «Իմ քայլի» և ընդդիմադիր «Լուսավոր Հայաստանի» միջև առճակատումները վերջին շրջանում բավականաչափ էին։ Հիշեցնեմ միայն մեկն ու աղմկահարույցը՝ լեզվակռիվը Ալեն Սիմոնյանի և Էդմոն Մարուքյանի միջև, որտեղ փոխադարձ վիրավորանքների պակաս չզգացվեց։
«Էն բոլոր հայտարարությունները, որոնք հրապարային արվում են, դրանից դուրս որևէ բան չկա», – լրագրողներին ասաց ընդդիմադիր խմբակցության ղեկավարը։ – «Արցախի հարցը էն հարցն ա, որ բոլորս էս առումով համախմբված ենք։ Էս մասով տարաձայնության հարց չկա։ Էրեկվա հարցուպատասխանի ժամանակ նաև արված հայտարարությունը հայ ժողովրդի ցանկությունների հետ կապված, Արցախի ինքնորոշման, կարգավիճակի և այլնի հետ կապված։ Ժամանակ առ ժամանակ, կարծում եմ, կարիք կա նման քննարկումներ ունենալու, նման ճշտումներ ունենալու։ Կարճ կարող եմ ասել, որ ինձ համար Արցախի հիմնախնդրով այս պահին, էն էղած շահարկումները, որոնք կան, դրանք բոլորը ինձ համար և՛ ի սկզբանե փարատված էին, և՛ հիմա էլ առավել ևս փարատված են․․․ Մանրամասն խոսել ենք»։
«Ազատության» հարցին, թե արդյոք վարչապետն ասել է, որ փուլային տարբերակ չկա սեղանին դրված, Մարուքյանն արձագանքեց․ – «Ինչ որ ասեց, բնականաբար, եթե հրապարակային հայտարարություններից դուրս գալու լինենք, դուրս կգանք։ Հրապարակային ինչ որ ասում եմ, սա էր։ Էս պահին ես մտահոգություն չունեմ Արցախի հիմնախնդրի հետ կապված առ այն, ինչ որ Հայաստանում անդադար շահարկվում է»։
«Թող մեզ ոչ ոք չասի ինչ ենք բանակցում, ինչ պետք է, բանակցում ենք», – երեկ Ազգային ժողովի ամբիոնից հայտարարել էր Փաշինյանը՝ հավելելով, որ խոսում են Արցախի ինքնորոշման իրավունքի միջազգային ճանաչման մասին։
Քննադատությունը ղարաբաղյան հարցով գլխավոր բանակցող Փաշինյանի հասցեին ահագնացավ Ռուսաստանի արտգործնախարարի հայտարարությունից հետո, թե ղարաբաղյան խնդրի կարգավորման քննարկումների հիմքում փուլային սկզբունքներն են։ Ընդ որում, առաջին փուլում, ըստ Սերգեյ Լավրովի, պետք է ազատագրվեն Ղարաբաղի շուրջ մի շարք շրջաններ։
Աղբյուրը՝ www.azatutyun.am
