«Ես ձեզ չեմ զրկում ելույթի իրավունքից, բայց արտահերթ ելույթի իրավունք ունի միայն ֆրակցիայի ղեկավարը՝ տիկին Զարուհի Փոստանջյանը». այսօր ավագանու նիստում ասաց Երեւանի քաղաքապետ Տարոն Մարգարյանը, երբ ավագանու «Երկիր ծիրանի» խմբակցության անդամ Մարինա Խաչատրյանն արտահերթ ելույթ էր խնդրում:
Տիկին Խաչատրյանը դժգոհեց, որ իր խոսափողն անջատում են, չեն թողնում ելույթ ունենալ: «Սակայն դա ինձ չի խանգարում, որ խոսեմ»,- ասաց ԵԾ անդամը:
Տարոն Մարգարյանն ասաց, որ արտահերթ ելույթի իրավունք ունի միայն Զարուհի Փստանջյանը: «Խնդրեմ, տիկին Փոստաջյան»,- ասաց քաղաքապետը:
Զարուհի Փոստանջյանն ասաց, որ ավագանու նիստերը գումարվում են՝ լուծելու Երեւանի խնդիրները, որոշումներ կայացնելու, թե ինչպես ծաղկեցնել Երեւանը: «Այս պահին մեր քաղաքացիները շենքում են, որոնք ուզում են մասնակցել ավագանու նիստին»,- ասաց ԵԾ խմբակցության ղեկավարը:
Զարուհի Փոստանջյանն ասաց, որ Տարոն Մարգարյանը զավթել է Երեւանի քաղաքապետարանը, հարստացել է, քանդել մեր քաղաքը, այս կամ այն անձի նվիրաբերել հողեր, յուրացրել է տարեկան 4 միլիոն դոլար:
Երեւանի քաղաքապետ Տարոն Մարգարյան էլ ասաց, որ եթե քաղաքացիները հարցեր ունեն, ապա Երեւանի աշխատակազմը պատրաստ է նրանց լսելու, առավելեւս, որ կա քաղաքացիների ընդունելություն:
