Երևան-Իջևան-Նոյեմբերյան ավտոճանապարհի Խաշթառակ գյուղի վարչական տարածքում գրեթե 10 տարի է, գործում է «Հեքիաթ» հանգստյան գոտին։ Մինչ այդ, նշված տարածքը եղել է անբարեկարգ, և նույն գյուղի բնակիչ, գործարար Սամվել Մատինյանը որոշում է մաքրել ու բարեկարգել նշված տարածքը, որից հետո ստեղծում է «Հեքիաթ» հանգստյան գոտին։
Ամեն տարի ունեցել են հաճախորդներ, այդ թվում՝ արտերկրից ժամանած զբոսաշրջիկներ, և հեղափոխությունից հետո կրկնապատկվել է այցելուների թիվը, ինչը դարձել է ոգևորության պատճառ, և Ս. Մատինյանն իր ընկերների, հարազատների հետ որոշել է ավելացնել որոշ բաներ տարածքում և լծվել է այդ գործին։ Երեխաների համար արդեն կառուցվում են խաղահրապարակներ, մարզադաշտ, փայտյա ու քարե փոքրիկ զրուցարաններ, որպեսզի, երբ հյուրերն ու զբոսաշրջիկները ժամանեն նշված վայր, գոհ վերադառնան իրենց երկրներ ու հավատան, որ հեղափոխությունից հետո Տավուշի մարզում տուրիզմը զարգանում է։
Այսօր՝ մայիսի 7-ին, գործարար Ս. Մատինյանը ֆոտոլրագրող Գագիկ Շամշյանի հետ զրույցում ասում էր. «Ազգային ժողովի նախկին պատգամավոր, իրեն գործարար համարող Խաչատուր Քոքոբելյանը, չգիտես ում բարձր հովանու ներքո, ավերել է Աղստև գետը՝ իր ՀԷԿ-ը աշխատեցնելու նպատակով խախտելով սահմանված նորմերը. քարե պատնեշ է կառուցել։
Բազմաթիվ անգամ փաստերով, եզրակացություններով նրան համոզել ենք, որ պետք է պատնեշը 1 մետր քանդի։ Ընդունել ու խոստացել է, որ կանի, սակայն հետո, չգիտես ինչու, հրաժարվել է, և նա, տարվելով ագահության մոլուցքով, հրաժարվում է անգամ գյուղապետերի որոշումները կատարել։
