Նկարիչների միությունում այսօր կայացավ «Ռոսլին» արվեստի հանդեսի երկրորդ համարի շնորհանդեսը՝ բավականին ուշագրավ երևույթ մեր մշակութային կյանքում թե ասելիքի խորքով ու թարմությամբ, թե արվեստի առջև ծառացած հիմնախնդիրների արծարծմամբ, թե սերունդների ու ժամանակների կամրջմամբ։
Գրիգոր Մովսիսյան-Նաիրա Կարապետյան ամուսնական զույգի մեկենասությամբ մեր ժամանակակից արվեստագետներն ըստ էության ստացել են արվեստի հիմնախնդիրների շուրջ խորհրդածությունների, սեփական խմորումների, ասելիքի միանգամայն յուրատիպ հարթակ, որտեղ խոսքն անշկանդ է, չկաղապարված։
Ամսագրի շնորհանդեսին ներկա էր, ողջույնի խոսք ասաց նկարիչների միության նախագահ Սուրեն Սաֆարյանը։ Իր խոսքն ասաց և ամսագրի հիմնադիր խմբագիր Վրեժ Առաքելյանը։ Հանդեսի այս համարը շահեկանորեն առանձնանում էր շապկին պատկերված կտավով, որի հեղինակն իր ուրույն ձեռագիրն ունեցող, գեղանկարիչ Մայիս Մխիթարյանն է՝ վառ անհատականություն մեր գեղարվեստում։
Գեղանկարչի ստեղծագործական կյանքի նկարագրով ու վերլուծությամբ հանդես եկավ կրոնագետ Վարդան Խաչատրյանը՝ ուշագրավ լույսի ներքո ներկայացնելով նրա արվեստը, բացելով հանդեսի շապիկ ծառայած կտավի խորքային ընթերցումները։
Նկատենք, որ կտավի թեման իրապես խորհրդանշային է։ Այնտեղ մեր «Սասունցի Դավիթ» էպոսի հերոսներ Սանասարի ու Բաղդասարի մկրտություն է պատկերված՝ վկայությունը մեր նախասկզբի, ինչպես նաև ուղղակի հավաստումը գաղափարական այն կողմնորոշիչների, որոնք «Ռոսլին» հանդեսը որդեգրել է որպես անցնելիք ճանապարհ ու դավանաբանություն։
Մեծ նավարկություն մաղթենք հանդեսին։
Հեղինակ՝ Մարտին Հուրիխանյան
