Բրիտանական բանակի գլխավոր շտաբի նոր պետ Պատրիկ Սանդերսը զինվորականներին հայտարարել է, որ նրանք պետք է պատրաստ լինեն Եվրոպայում նոր պատերազմի։ BBC-ին հասանելի է դարձել հուշագիրը, որը ներքին փոստով տարածվել է բրիտանական զինվորականներին:
«Այժմ հրամայական է ստեղծել բանակ, որը կարող է կռվել մեր դաշնակիցների կողքին և մարտերում հաղթել Ռուսաստանին», – ասել է Սանդերսը:
Նրա խոսքով՝ այժմ հիմնական խնդիրներն են՝ արագացնել բրիտանական զինված ուժերի արդիականացումը՝ ՆԱՏՕ-ի հզորացման համար և թույլ չտալ Ռուսաստանին ավելի առաջ շարժվել եվրոպական տարածքով։
«Մենք այն սերունդն ենք, որը պետք է բանակը պատրաստի Եվրոպայում նորից կռվելու համար»,- ասվում է Սանդերսի շրջաբերականում։
Հրամանատարի խոսքով՝ ինքը 1941 թվականից ի վեր առաջին շտաբի պետն է, ով ղեկավարում է բրիտանական բանակը Եվրոպայում ցամաքային պատերազմի ֆոնին, մայրցամաքային տերության մասնակցությամբ։
«Ռուսաստանի ներխուժումն Ուկրաինա ընդգծում է մեր առաջնային առաքելությունը՝ պաշտպանել Մեծ Բրիտանիան և պատրաստ լինել կռվել և հաղթել ցամաքային պատերազմներում, և ամրապնդում է ռուսական ագրեսիան մեր ուժի սպառնալիքով զսպելու անհրաժեշտությունը»:
