6 համայնքների պաշտոնական կայքերում ստեղծելու են նոր բաժին, խոշորացված համայնքների բյուջեները տնօրինելու նոր մեխանիզմ է ներդրվելու
««Կոմպասս» գիտահետազոտական, կրթական եւ խորհրդատվական կենտրոն» հասարակական կազմակերպությունը Եվրամիության կողմից ֆինանսավորվող եւ «Իրավաբանների հայկական ասոցիացիա» հասարակական կազմակերպության ղեկավարությամբ իրականացվող «Կառուցողական երկխոսության հանձնառություն» ծրագրի շրջանակներում իրականացնում է «Մասնակցային մոնիթորինգ՝ հանուն խելացի համայնքների Հայաստանում» ենթադրամաշնորհային ծրագիրը Շիրակի, Լոռու եւ Տավուշի մարզերի երկուական խոշորացված համայնքներում:
Ծրագիրը «Կոմպասս»-ն իրականացնում է՝ իր գործընկերներ «ՀԿ Կենտրոն» քաղաքացիական հասարակության զարգացման ՀԿ-ի, «Դիլիջանի երիտասարդների համագործակցության կենտրոն» ՀԿ-ի եւ «Տեղեկատվական համակարգերի զարգացման եւ վերապատրաստման կենտրոն» ՀԿ-ի հետ համատեղ՝ «Իրավաբանների հայկական ասոցիացիա» հասարակական կազմակերպության ղեկավարությամբ իրականացվող կոնսորցիումի միջոցով գործարկվող «Կառուցողական երկխոսության հանձնառություն» ծրագրով տրամադրված ենթադրամաշնորհների շրջանակներում:
Ծրագիրն ընդգրկելու է Շիրակի մարզի Աշոցք ու Ախուրյան, Լոռու մարզի Թումանյան ու Ստեփանավան, Տավուշի մարզի Դիլիջան ու Նոյեմբերյան խոշորացված համայնքները։
«Կոմպասս» հասարակական կազմակերպության նախագահ Ղարիբ Հարությունյանն ասում է, որ համայնքների ընտրությունը պատահական չի եղել։ Յուրաքանչյուր մարզում ընտրվել են առաջին փուլով խոշորացված եւ նախորդ տարի խոշորացված մեկական համայնք, որպեսզի վերլուծական համեմատություն անցկացվի համայնքների մատուցվող ծառայությունների որակների միջեւ։
«Համեմատական վերլուծություն է անցկացվելու՝ պարզելու խոշորացված համայնքի ծառայությունների մատուցման գործընթացի թերությունները եւ առավելությունները, լուսավորության, աղբահանության, եւ ճանապարհային ենթակառուցվածքների ոլորտներում պետք է մոնիթորինգ անցակցվի»,-ասում է Ղ․Հարությունյանը։
«ՀԿ Կենտրոն»-ի նախագահ Արփինե Հակոբյանն ավելացնում է, որ մարզերի ընտրությունն էլ պատահական չէ։ Շիրակում, Լոռիում եւ Տավուշում սոցիալական խնդիրները համեմատաբար սուր են դրսեւորվում, աղքատության մակարդակը բարձր է, գործազուրկների թիվը՝ մեծ։
Ծրագրի նպատակն է՝ նպաստել համայնքների կողմից մատուցվող ծառայությունների որակի բարձրացմանը։ Նախատեսվում է ընտրված 6 համայնքների պաշտոնական կայքերում ստեղծել նոր բաժին։
Ծրագրի շրջանակում մշակվելու են հանրային քաղաքականության բարելավման առաջարկությունների փաթեթներ, աշխատանքներ են տարվելու բնակչության տեղեկացվածությունը եւ մասնակցությունը հանրային կառավարման ոլորտում խթանելու ուղղություններով։
