Չնայած երկար եւ համառ պայքարին, անցած տարեվերջին կառավարությունը որոշեց վերակազմակերպել Պետական կամերային երաժշտական թատրոնը՝ միացնելով այն Հ. Պարոնյանի անվան երաժշտական կոմեդիայի պետական թատրոնին: Գործադիրի նույն որոշմամբ՝ Պետական կամերային երաժշտական թատրոնին պատկանող 403,4 քմ մակերեսով անշարժ գույքը եւ դրա զբաղեցրած 0,056035 հա հողատարածքն անժամկետ, անհատույց օգտագործման իրավունքով տրվեց Հայաստանի պետական սիմֆոնիկ նվագախմբին:
Դեռ նոյեմբերից Կամերային թատրոնը դադարեցրեց հանդիսատեսի համար ներկայացումները, քանի որ շենքի տարածքը, որոշման համաձայն, փոխանցվեց սիմֆոնիկ նվագախմբին՝ որպես փորձասենյակ:
Թատրոնի դերասանները տեղավորվել են տարբեր թատրոններում, 25 հոգանոց ստեղծագործական կազմից 9 դերասան, այդ թվում՝ թատրոնի գլխավոր ռեժիսոր Սամսոն Ստեփանյանը, հունվարից արդեն դարձել են Պարոնյան թատրոնի աշխատակիցներ։ Մնացած դերասանները տեղափոխվել են Սոս Սարգսյանի անվան համազգային, Հովհ. Թումանյանի անվան պետական տիկնիկային եւ «Գոյ» թատրոններ։
Քանի որ մի քանի ամիս է արդեն՝ թատրոնների միավորման գործընթացն ավարտվել է, Հայաստանի պետական սիմֆոնիկ նվագախմբից հետաքրքրվեցինք․ արդեն տեղափոխվե՞լ են կամերայինի շենք, որքանո՞վ է այն հարմար նվագախմբի համար։
Նվագախմբի լրատվական բաժնից մեզ պատասխանեցին, որ Հայաստանի պետական սիմֆոնիկ նվագախումբը շենքի նկատմամբ իրավունքների պետական գրանցման վկայականն ստացել է այս տարվա հունվարի 26-ին։ Այժմ կառավարության հետ քննարկումներ են ընթանում՝ հատկացված շենքի վերանորոգման եւ նվագախմբի փորձերի իրականացման համար անհրաժեշտ պայմաններ ստեղծելու վերաբերյալ: «Այն պետք է ծառայի որպես լիարժեք մեծ փորձատեղ, պահեստ՝ գործիքների համար, եւ գրասենյակային տարածք: Այս պահին քննարկվում են թե՛ նախագծանախահաշվային փաստաթղթերի պատրաստման եւ թե՛ դրանց հիման վրա հետագայում շինարարության ու գույքային վերազինման հարցերը»:
Նվագախմբից դժվարացան ասել, թե ինչքան կտեւեն շենքի շինարարության եւ վերազինման աշխատանքները, եւ երբ կտեղափոխվեն նոր տարածք։ Փոխարենը տեղեկացրին, որ նվագախումբն այսօր ելույթ է ունենալու Օմանի մայրաքաղաքի օպերային թատրոնում։ Ներկայացվելու են Դոնիցետիի ստեղծագործությունները։ Տոմսերն էլ գրեթե սպառված են։
