2017 թվականի ընթացքում Հայաստանում դատապարտվել է 3488 անձ, որից 2410 անձի նկատմամբ կայացված դատավճիռները հաշվետու ժամանակահատվածում մտել են օրինական ուժի մեջ, Aysor.am-ը տեղեկանում է Հայաստանի դատական դեպարտամենտից։
2410 անձանցից ազատազրկման ձևով պատիժ է նշանակվել 1410-ի նկատմամբ, կալանքի ձևով` 181 անձի նկատմամբ, կարգապահական գումարտակում պահելու ձևով` 1 անձի նկատմամբ, իսկ տուգանքի ձևով՝ 752 անձի նկատմամբ: Ըստ աղբյուրի՝ պատիժը պայմանականորեն չի կիրառվել 859 անձի նկատմամբ։
Համեմատության համար նշենք, որ 2016-ի ընթացքում դատապարտվել է 3339 անձ, որից 2533 անձի նկատմամբ կայացված դատավճիռները նշված ժամանակահատվածում մտել են օրինական ուժի մեջ:
Այսպիսով, 2017-ի ընթացքում, 2016 թվականի համեմատ, ՀՀ ընդհանուր իրավասության առաջին ատյանի դատարաններում ստացված քրեական գործերի քանակն ավելացել է 428-ով կամ 9,3%-ով։
Ըստ ավարտված գործերի` դատի տրված անձանց թիվն ավելացել է 100-ով, իսկ դատապարտվածների թիվն ավելացել է 149-ով։
Նշվում է, որ ինչպես 2016 թվականին, այնպես էլ 2017 թվականին դատապարտված անձանց թվում որոշակի նվազումներով հանդերձ զգալի թիվ են կազմել գողության, առանց իրացնելու նպատակի թմրամիջոցների կամ հոգեմետ (հոգեներգործուն) նյութերի ապօրինի շրջանառության, ինչպես նաև զինվորական կարգի դեմ ուղղված հանցագործությունների համար դատապարտվածները։
Աղբյուրը` www.aysor.am
