FACT.tv-ն (First AntiCorruption TV, առաջին հակակոռուպցիոն ալիք) հրապարակել է տեսանյութ, որտեղ փաստագրված ու ներկայացված է Երևանի քաղաքապետ Տարոն Մարգարյանի ունեցվածքը: «Եկեք հասկանանք՝ որտեղից 575 հազար դրամ ամսական աշխատավարձ ստացող քաղաքապետին նման ճոխություններ»,- ասում է տեսանյութի վարող Անի Խաչիկյանը:
Հետաքննությունը մեկնարկել է 2017թ․ նոյեմբերի 1-ին, ավարտվել 2018թ․ փետրվարի 21-ին:
Ինչպես արդեն հայտնել էինք, վարչապետի կոռուպցիայի դեմ պայքարի գծով օգնական Արեն Մկրտչյանն անդրադարձել էր Տարոն Մարգարյանի շքեղ բնակարանին, մի քանի օր անց էլ հայտնել. «5-7 օր, և կլսեք առաջին լուրջ հակակոռուպցիոն պայթյունն իմ գործունեության արդյունքում։ Անունն ավելի քան հայտնի է բոլորիդ: 2017թ. նոյեմբերին հիմնեցի նախագիծ, որը կոչվում է Fact (First AntiCorruption TV, առաջին հակակոռուպցիոն ալիք)։ Նպատակն էր հետաքննել ու փաստարկված վիդեոբովանդակության տեսքով հանրությանը ներկայացնել Հայաստանի Հանրապետության միջոցները գողացած տարբեր տրամաչափի օլիգարխի համբավ ձեռք բերած անհատների ապօրինի ունեցվածքը։
