Հայաստանում տեղի ունեցած դրական փոփոխությունները, որոնք դրսեւորվում են տնտեսության տարբեր ոլորտներում, ուզենք, թե չուզենք, հասնելու է Արցախ: Այս մասին այսօր` նոյեմբերի 10-ին, «Ազատ հայրենիք» կուսակցության 7-րդ համագումարին ասաց կուսակցության նախագահ Արայիկ Հարությունյանը:
«Արդեն իսկ ունենք շոշափելի արդյունքներ: Մենք տեսնում ենք, թե ինչ ծավալի եւ որակական շինարարություն է իրականացնում Հայաստանի կառավարությունը, ինչպիսի քաղաքականություն է վարում աշխատավարձերի բարձրացման ուղղությամբ, եւ մենք վստահ ենք, որ այդ իրականացվելու է նաեւ Արցախում»,-ասաց նա:
Արայիկ Հարությունյանի խոսքով` աննախադեպ աճի տեմպեր են սպասվում Հայաստանի տնտեսության զարգացման առումով. «Երբ ամսիներ առաջ հայտարարում էի 7 տոկոս տնտեսական աճի մասին, թերահավատ էին շատերը, այսօր հայտարարում եմ, որ Հայաստանի տնտեսական աճը 2020 թվականին մոտ է լինելու 8-9 տոկոսին, իսկ 2021 թվականին՝ երկնիշ»:
«Ազատ հայրենիք» կուսակցության նախագահը նշեց, որ Հայաստանի տնտեսության վիճակին համահունչ պետք է զարգանա նաեւ Արցախի Հանրապետության տնտեսությունը:
Արայիկ Հարությունյանի խոսքով՝ Հայաաստանում տեղի ունեցած դրական փոփոխությունները դրական են ազդելու նաեւ Արցախում. «Մենք ամեն ինչ անելու ենք, որպեսզի դրանց ընթացքը կասեցնող դավադիրները մնան քաղաքական լուսանցքում: Արցախը Հայաստանից ու Հայաստանի իշխանություններից իբր թե պաշտպանողներն այսօր զբաղված են այլոց շահերը սպասարկելով եւ այն խոչընդոտն են, որն առաջիկայում արմատախիլ ենք անելու միասնական: Արցախը ՀՀ-ից պաշտպանելու հակապետական տրամադրությունները հօդս են ցնդում, երբ տեսնում ենք` ինչպիսի բարեփոխումներ են իրականացվում մեր բանակում»:
Նա նշեց, որ ՀՀ վարչապետի հետ հանդիպմանը փակագծեր են բացվել, «Ազատ հայրենիք» խմբակցության պատգամավորները գոհ էին իրականացված աշխատանքներից` սկսած սննդից, վերջացրած սպառազինությունից:
Արայիկ Հարությունյանի շեշտեց՝ ՀՀ իշխանությունների եւ իրենց պատկերացումները Արցախյան խնդրի կարգավորման վերաբերյալ նույնական են:
«Արցախի ժողովրդի կարգավիճակն ու անվտանգությունը մեր այն առաջնահերություններն են, որոնց հետ կապված որեւէ զիջման մասին խոսք անգամ չի կարող լինել»,-ասաց նա` նշելով, որ ԼՂ հիմնախնդրի կարգավորման արդյունավետության ապահովման կարեւոր երաշխիք կարող է դառնալ Արցախի վերադարձը բանակցային սեղան:
