ՀԱՂՈՐԴՈՒՄ-ԱՀԱԶԱՆԳ Մեծարգո Պարոն Վարչապետ․ Եղվարդ քաղաքի Նատի թաղամասում ապօրինաբար կառուցված Արմօյլ Նավթավերամշակման գործարանը ամեն վայրկյան սպառնում է մարդկանց առողջությանն ու կյանքին։ Ընդամենը 3-4 տարի առաջ մեծ ծավալով սկսված շինարարական աշխատանքները այսօր արդեն ավարտվել են և գործարանատերերը կարծես թե պատրաստվում են բացել այն։ Պարոն վարչապետ վստահ եմ որ տեղյակ եք, երբ օրեր առաջ օգոստոսի 24-ին՝ ժամը 15:47-ին Երևան քաղաքի Սեբաստիա փողոցում գտնվող «Մալաթիա մոլ»-ի շենքում հրդեհ է բռնկվել և կային տուժածներ: Հրդեհի բարդության «Թիվ 2» կանչով դեպքի վայր էին մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից 6 մարտական հաշվարկ, 2 ավտոսանդուղք, փրկարարական ուժերի վարչության հատուկ նշանակության փրկարարական աշխատանքների իրականացման կենտրոնի փրկարարական ջոկատը, ճգնաժամային կառավարման ազգային կենտրոնի արտակարգ իրավիճակների արձագանքման և օպերատիվ խմբերը, ինչպես նաև հոգեբանական աջակցության բաժնի հոգեբանական խորհրդատվության գծով հրահանգիչը: Ժամը 16:35-ին հրդեհի բարդության աստիճանը բարձրացվել է «Թիվ 3» կանչի. դեպքի վայր էր մեկնել ԱԻՆ ՓԾ Երևան քաղաքի փրկարարական վարչության հրշեջ-փրկարարական ջոկատից ևս չորս մարտական հաշվարկ: Եվ ընդամենը բռնկվել էր կառույցի կիսակառույց մասը որտեղ առավելագույնը կահավորում կարող էր լինել և պահեստային գործիքներ, պատկերացրեք ինչ կլիներ եթե թեկուզ քիչ քանակությամբ բիտում լիներ մոլում։Կամ այնպիսի թունավոր նյութեր(ծծումբ, վանադիում և այլն) որոնք օգտագործվում են նավթավերամշակման գործարանում, մարդիկ րոպեների ընթացքում կթունավորվեին և այսօր հարյուրավոր զոհեր կունենայինք։ Հարգարժան վարչապետ Ն․ Փաշինյան, ԱԻ նախարար Ֆ․ Ցոլակյան, Ձեր ուշադրությունն ենք հրավիրում այն փաստի վրա, որ ապօրինի կառուցված գործարանը ինքնին պայթյունավտանգ է, շինարարությանը չի հետևել ԱԻՆ համապատասխան բաժինը(հակահրդեհային անվտանգության), անգամ մինչ օրս տվյալ գործարանը շինարարության թույլտվություն չի ստացել, էլ չասենք որ նաև ՇՄԱԳ փորձաքննություն չի անցել, որը սահմանված է օրենքով։ Խնդրում ենք ստուգել նրանց փաստաթղերը և ամեն բան պարզ կլինի Ձեզ համար։ Ինչ կլինի մեզ՝ բնակիչներիս հետ, եթե նավթով ու բիտումով լի տոննաներ կշռով բակերը նման հրդեհի ճիրաններում հայտնվեն, 300-ից ավելի բնակիչ ունեցող նատի թաղամասը բնակիչներով հանդերձ կայրվի և անգամ ԱԻՆ ջոկատները չեն կարողանա փրկել մեզ, քանզի պայթյունավտանգ գործարանը բնակելի տներից ընդամենը 30-50 մետր հեռավորության վրա է գտնվում, երբ միջազգային ստանդարտները նվազագույնը սահմանում են 1000 մետր։ Այն ճանապարհի եզրին է և անգամ պահպանված չեն նվազագույն անվտանգության կանոնները։ Տերերը խոսում են միայն ներդրումից, բայց միթե ապօրինի ներդրումը բնակչության կյանքից կարևոր է։ Այս հարցին լուծում չտալու դեպքում մեծ ու փոքրով կդիմենք ծայրահեղ քայլերի, կլքենք մեր տները և կտեղափոխվենք բնակության՝ հանրապետության հրապարակում։Հուսանք որ կնդունեք մեզ, արդեն հեղափոխությունից հարազատ դարձած հրապարակում, որտեղ միասին որոշեցինք մեր երկրի ապագան։ Սիրելի վարչապետ գիտենք, որ Ձեզ մտահոգում է քաղաքացու կյանքը, մի ստիպեք մտածել, որ մենք հեղափոխության ժամանակ ճանապարհ փակելով ձեզ համար ընդամենը գործիք ենք դարձել, թույլ մի տվեք կասկածել ձեր մարդասիրությանն ու վճռականությանը, քանի որ դեռևս սիրում և վստահում ենք ձեզ։ Նատի թաղամասի ողջ բնակչության անունից խնդրում ենք անձամբ զբավել այս հարցով։ Մենք գիտենք որ մենակ չենք, մենզ միայնակ չթողնեք։
Նատի թաղամասի մի խումբ բնակիչներից։
