Կյանքի 75-րդ տարում մահացել է աշխարհագրական գիտությունների դոկտոր, պրոֆեսոր, հայտնի բնապահպան Կարինե Դանիելյանը։ Նա 2012-ից ղեկավարում էր Մանկավարժական համալսարանի Էկոլոգիայի և կայուն զարգացման աբիոնը և միայն առողջական խնդիրների պատճառով ընդհատվեց նրա արգասաբեր գործունեությունը բուհում։
Կարինե Դանիելյանը նաև ՀՀ պետական և հասարակական գործիչ էր, «Հանուն կայուն մարդկային զարգացման» ասոցիացիայի նախագահ, ՀՀ բնության և շրջակա միջավայրի պահպանության առաջին նախարարը։
1970 թվականին ավարտել է Երևանի պետական համալսարանի կենսաբանական ֆակուլտետի կենսաֆիզիկայի բաժինը։ 1971-1974 թվականներին սովորել է ՀԽՍՀ ԳԱ ասպիրանտուրայում, 1994-1996 թվականներին՝ ԵՊՀ դոկտորանտուրայում։
1976 թվականից ծավալել է գիտական գործունեություն՝ աշխատելով տարբեր հաստատություններում և զբաղեցնելով տարբեր պաշտոններ՝ կրտսեր գիտաշխատողից մինչև Երևան քաղաքի փոխքաղաքապետ՝ բնապահպանության և առողջապահության գծով և ՀՀ բնության և շրջակա միջավայրի պահպանության նախարար։
1995 թ-ից մինչ օրս ՄԱԿ-ի /UNDP, UNEP, UNICEF/ ազգային փորձագետ էր, 2009-ից՝ ՀՀ Հանրային խորհրդի անդամ, ՀՀ Նախագահին առընթեր Սևանա լճի հիմնախնդիրների հանձնաժողովի անդամ։
Շուրջ 270 գիտական հոդվածների և մենագրությունների հեղինակ է։ Անդամակցում էր մի շարք միջազգային կազմակերպությունների, արժանացել էր բազմաթիվ կոչումների և պարգևների, այդ թվում նաև Երևանի պատվավոր քաղաքացի էր։
Կարինե Դանիելյանը դասավանդել է բարձրագույն ուսումնական տարբեր հաստատություններում, մշտապես բարձրաձայնել բնապահպանական կարևոր հարցերն ու խնդիրները։ Կարինե Դանիելյանի՝ անվանի գիտնականի և վաստակաշատ մանկավարժի հիշատակը վառ կմնա իր գործընկերների և ուսանողների սրտերում:
