«Բարգավաճ Հայաստան» կուսակցության ղեկավար Գագիկ Ծառուկյան կալանքի հարցի քննության ժամանակ ինքնաբացարկի միջնորդություն է ներկայացվել դատավոր Ռոբերտ Պապոյանին, հայտնեց Ծառուկյանի պաշտպաններից Երեմ Սարգսյանը:
«Ինքնաբացարկի միջնորդություն ենք ներկայացրել դատարանին, դատարանը հեռացել է խորհրդակցական սենյակ»,- ասաց նա` հավելելով, որ խնդիրը մակագրությունների կարգն է, որն ի սկզբանե արդեն «խախտում է արդար դատաքննության իրավունքը»: Ըստ Երեմ Սարգսյանի` պատահականության սկզբունքով պետք է լինի դատավորի ընտրությունը:
Բացի այդ, պաշտպանը հայտնեց, որ ողջամիտ ժամկետ են ուզել, որպեսզի կարողանան լիարժեք պաշտպանվել:
Նրա խոսքով` հավանաբար 2-3 ժամից պարզ կլինի` իրենց միջնորդությունը բավարրավելու է, թե ոչ:
Հիշեցնենք, որ Ծառուկյանին կալանավորելու միջնորդություն Ազգային անվտանգության ծառայությունն է ներկայացրել: Հարցի քննությունը սկսվել է երեկ, շարունակվել այսօր` ժամը 16:30-ից: ԲՀԿ առաջնորդը, ըստ նրա փաստաբանի, մեղադրվում է ընտրողներին կաշառք տալու կամ ընտրողի ազատ կամքը խոչընդոտելու համար: Նույն այդ քրեական գործով Ծառուկյանը երեքշաբթի օրը զրկվեց պատգամավորական անձեռնմխելիությունից։ Նրա նկատմամբ քրեական հետապնդում սկսելուն և ազատությունից զրկելուն համաձայնություն տալու միջնորդությունը ներկայացրել էր գլխավոր դատախազ Արթուր Դավթյանը։
Աղբյուրը՝ www.azatutyun.am
