Այսօր՝ հունիսի 13-ին, խոշոր ավտովթար է տեղի ունեցել Վայոց Ձորի մարզում: Ժամը 09:30-ի սահմաններում Գառնի գյուղի բնակիչ 46-ամյա Լասլո Բորբելին Երևան-Մեղրի ավտոճանապարհի 149-րդ կմ հատվածում իր վարած Oepl Zafira մակնիշի 35 QR 681 համարանիշի ավտոմեքենայով դուրս է եկել ճանապարհի երթևեկելի գոտուց և գլխիվայր շրջվելով հայտնվել Դարբի գետում:
Ինչպես հայտնում է ֆոտոլրագրող Գագիկ Շամշյանը, ըստ նախնական տեղեկությունների վթարի հետևանքով բարեբախտաբար զոհեր և վիրավորներ չկան: Դեպքի վայր են ժամանել Արտակարգ իրավիճակների նախարարության Փրկարար ծառայության Վայքի թիվ 61 հրշեջ-փրկարարական ջոկատը՝ 1 մարտական հաշվարկով՝ ջոկատի հրամանատար Ռուսլան Զոհրաբյանի գլխավորությամբ:
Փրկարարները դեպքի վայրից 2 քաղաքացու տեղափոխել են Վայքի հրշեջ-փրկարարական ջոկատ, քանի որ նրանք ամբողջովին թրջված են եղել և ինքնակամ են դուրս եկել գետից: Դեպքի վայր են ժամանել Ճանապարհային ոստիկանության 2-րդ սպայական գումարտակի 6-րդ վաշտի 2-րդ դասակի ծառայողները՝ վաշտի հրամանատար Գեղամ Մարգարյանի գլխավորությամբ: Վթարի մասին ՃՈ 1-77 օպերատիվ կառավարման կենտրոնի պատասխանատու հերթապահ Երվանդ Ալեքսանյանը տեղեկությունը փոխանցել է Ոստիկանության Վայքի բաժին, որտեղից ժամանել է օպերատիվ խումբը:
Կարդալ շարունակությունը՝ shamshyan.com http://shamshyan.com/hy/article/2018/06/13/1098350/
