Ընդդիմադիր առաջնորդները իրենց համախոհներով առավոտյան ժամը 08:00-ից մայրաքաղաքում վերսկսել են անհնազանդության ակցիաները:
Նրանք Երևանի տարբեր հատվածներում փողոցներ են փակել, որոնց թվում՝ Մաշտոցի պողոտայից դեպի «Զվարթնոց» օդանավակայան տանող ճանապարհը։
Երթևեկության վերականգման նպատակով տեղում կենտրոնացված են մեծաթիվ ոստիկանական ուժեր, որոնք փորձում են վերականգնել երթևեկությունը։
Անհնազանդության ակցիաներ իրականացնող քաղաքացիներից ոմանք պոկում են ոստիկանների համազգեստի տարբերանշանները, հանում նրանց գլխարկները, վիրավորանքներ հնչեցնում իրավապահների հասցեին:
Կան բերման ենթարկվածներ։ Նրանց թվում է նաև Ռոբերտ Քոչարյանի որդին՝ Լևոն Քոչարյանը:
Բերման են ենթարկվել և ոստիկանության Մաշտոցի բաժանմունք տեղափոխվել նաև նախկին պատգամավորներ Նաիրա Զոհրաբյանն ու Արմեն Աշոտյանը, մինչ այդ նրանք վիրավորանքներ էին հնչեցնում քաղաքացիների հասցեին, որոնք անհամաձայնություն էին հայտնում Երևանում իրականացվող գործողություններին:
Հիշեցնենք՝ մայիսի 2-ից վարչապետ Նիկոլ Փաշինյանի հրաժարականի պահանջով անհնազանդության ակցիաներ են սկսվել Երևանում. խորհրդարանական ընդդիմության նախաձեռնած շարժումը ակցիաներին զուգահեռ նստացույց է հայտարարել Ֆրանսիայի հրապարակում, որն իրականացնում են շարժման փոքրաթիվ անդամներ:
