Ռազմական բախումների հետևանքով հայկական կողմն ունի 58 զոհ

155

Արցախի պաշտպանության նախարարությունը հաղորդում է այսօր զոհված ևս 27 զինծառողի մասին, երեկ սկսված ռազմական բախումների հետևանքով հայկական կողմի զոհերի պաշտոնական թիվն արդեն 58 է։

Հաղորդվում է, որ մոտ 200 հոգի էլ վիրավոր է, նրանցից 80-ը տեղափոխվել են Երևան, մյուսներն Արցախում են։ Ըստ Պաշտպանության նախարարության ներկայացուցիչ Արծրուն Հովհաննիսյանի՝ «մեծ մասի վիճակը թեթև է, առաջին բուժօգնությունից հետո վերադարձել են ծառայության»։

«Բոլորը գտնվում են պատշաճ բժշկական վերահսկողության ներքո տարբեր զինվորական հոսպիտալներում, ինչպես նաև քաղաքացիական հիվանդանոցներում: Այս առումով պետք է ասենք, որ մեր ամբողջ առողջապահական համակարգը ոտքի վրա է և հստակ խնդիր է կատարում», – նշեց նա:

Ողջ գիշեր մարտեր են ընթացել Արցախի սահմանի ամբողջ երկայնքով՝ հատկապես հյուսիսի և հարավի ուղղությամբ, հայկական կողմին հաջողվել է դիրքային բարելավումներ իրականացնել, այսօր կեսօրին հայտարարեց Արծրուն Հովհաննիսյանը. – «Մեր զինված ուժերին հաջողվել է դիրքային նոր բարելավումներ իրականացնել, հակառակորդը, բնականաբար, դրանով չի հանգստացել, շարունակել է որոշ տեղերում հակագրոհներ իրականացնել, որոնք հետ ենք մղել: Վաղ առավոտյան կիրառելով հրետանային միջոցներ, այդ թվում նաև ծանր հրանետեր` ադրբեջանական զինված ուժերի ստորաբաժանումները վերսկսել են հարձակվողական գործողությունները, մեր զինված ուժերն այս պահին վարում են համառ մարտեր, հերոսական մարտեր»:

Արցախի նախագահ Արայիկ Հարությունյանն իր հերթին այսօր ավելի վաղ գրել է, որ Պաշտպանության բանակն իրականացրել է «մի քանի փայլուն ռազմագործողություններ՝ պաշտպանական բնագծի տարբեր հատվածներում վերականգնելով կորցրած դիրքերը կամ ունեցել որոշակի առաջխաղացում»: Հաղորդվում է նաև, որ վաղ առավոտյան Ադրբեջանը կիրառել է հրետանային միջոցներ, այդ թվում` ծանր հրանետեր։

Հարցին, թե արդյոք հայկական կողմը գերեվարել է ադրբեջացնի բարձրաստիճան զինվորականի, Հովհաննիսյանը պատասխանեց, որ այժմ գերության մեջ որևէ մեկը չկա. – «Այս պահին կարող եմ ասել, որ որևէ կենդանի զինվորական գերության մեջ մեր կողմում չկա, բայց քանի որ կան բազում դիեր ադրբեջանական զինծառայողների, որևէ բան վերջնականապես հաստատել կամ հերքել չեմ կարող»:

Հայտարարությամբ է հանդես եկել նաև Հայաստանի արտգործնախարարությունը` նշելով, որ «Արցախի և Ադրբեջանի միջև շփման գծի ողջ երկայնքով իրադրության սրման վերաբերյալ միջազգային հանրության, այդ թվում` ԵԱՀԿ Մինսկի խմբի համանախագահների և նրանց երկրների հայտարարությունները ի ցույց են դնում, որ միջազգային հանրությունը դատապարտում է ուժի կիրառումը և տարածաշրջանային խաղաղության և անվտանգության խաթարումը»: «Բախվելով միջազգային հանրության այս դիրքորոշման միասնականությանը՝ ադրբեջանական կողմը դիմել է բացահայտ կեղծիքների տարածմանը՝ մեղադրելով հայկական կողմին մարտական գործողությունների սանձազերծման մեջ: Մինչդեռ գոյություն ունեն անհերքելի փաստական հիմքեր առ այն, որ հենց Ադրբեջանն է նախաձեռնել ագրեսիան, որն ունի երկու առանձնահատկություն. Ալիևը հրապարակավ հրաժարվել է խաղաղ գործընթացից և խնդիր է դրել ղարաբաղյան հիմնախնդիրը լուծել լայնածավալ պատերազմով, երկրորդ` այս նպատակի հետապնդման համար Ադրբեջանը ստանում է Թուրքիայի լայնածավալ ռազմաքաղաքական աջակցությունը։ Ադրբեջանի հետ կողք կողքի մարտնչում են թուրքական ռազմական մասնագետները, որոնք օգտագործում են թուրքական արտադրության սպառազինություն, այդ թվում՝ անօդաչու թռչող սարքեր և ռազմական ինքնաթիռներ: Արժանահավատ աղբյուրներից ստացվող տեղեկությունների համաձայն՝ Թուրքիան հավաքագրում է օտարազգի ահաբեկիչ զինյալների և տեղափոխում վերջիններիս Ադրբեջան: Միաժամանակ Թուրքիան բարձրագույն ղեկավարության մակարդակով լիարժեք քաղաքական և քարոզչական աջակցություն է տրամադրում Ադրբեջանին: Փաստացիորեն ստեղծվել է մի իրավիճակ, երբ Արցախի ժողովուրդը մարտնչում է թուրք-ադրբեջանական դաշինքի դեմ», – ասված է ԱԳՆ հայտարարությունում:

Իր հերթին Հովհաննիսյանը հաղորդեց Մարտակերտին ուղղված հարվածների մասին. – «Այո, այս պահին թիրախավորված են նաև բնակավայրեր, ես անմիջապես բրիֆինգի մտնելուց առաջ ստացա հերթական կադրերը Մարտակերտ քաղաքից, ադրբեջանական հրետանին խփում է Մարտակերտ քաղաքին»: