Բաց նամակ ՀՀ վարչապետ Նիկոլ Փաշինյանին

1647

Բաց նամակ ՀՀ վարչապետ Նիկոլ Փաշինյանին
Հարգելի պարոն վարչապետ

Վերջին շաբաթների ընթացքում Հայաստանի Հանրապետությունում տեղի ունեցած վերածնունդի արդյունքում մենք՝ մշակույթի գործիչներս, լիահույս ենք, որ բարեփոխումներ տեղի կունենան նաև մշակութային ոլորտում: Ներկայումս ՀՀ-ում կան մի շարք խնդիրներ, որոնք մտահոգում են մշակութային գործիչներիս:

Թատրոնի և կինոյի ոլորտում առկա խնդիրներից մի քանիսը մասնավորապես ուզում եմ մատնանշել:

1. Թատրոնի և կինոյի ոլորտում ընտանեկան կլանային համակարգը: Գոյություն ունեցող համակարգն ինքնըստինքյան բերում է կոռուպցիայի (ֆինանսավորում մերձավոր շրջանակին) և հնարավորությունների սահմանափակումների (ոչ մերձավոր շրջանակի ֆինանսավորման բացառում):

2. Հանձնաժողովների ոչ ֆունկցիոնալ լինելը, որ անմիջական հետևանքն է առաջինի: Հանձնաժողովների անդամները կամ շահագրգիռ անձինք են, կամ ենթարկվում են նախարարության կլանային որոշումներին, որի արդյունքում կորցնում են իրենց անկախ դիտարկում անելու պարտադիր գործառույթը:

3. Կոմերցիոն ներկայացումների հնարավորությունների սահմանափակում: Վերջին 6-7 ամիսների ընթացքում թատրոնների՝ վարձակալությամբ տրվող դահլիճների գները բազմապատկվել են մի քանի անգամ, ինչի արդյունքում կոմերցիոն ներկայացումները փաստացի զրկված են ինքնաֆինանսավորման հնարավորությունից և հետևաբար նաև կենսունակ չեն վերարտադրողականության տեսանկյունից:

4. Թատրոնի, կինոյի, մշակույթի ոլորտում առհասարակ կոռուպցիայի աղբյուր են հանդիսանում նաև մի շարք այնպիսի ինստիտուտներ, ինչպիսիք են վաստակավորի և ժողովրդականի կոչումների ինստիտուտը, թատրոններում պարտադիր գլխավոր ռեժիսորների ինստիտուտը, անարդյունավետ փառատոնները, որոնցից յուրաքանչյուրի խնդիրների մասին պատրաստ ենք անձամբ ավելի մանրամասն ներկայացնել:

Հաշվի առնելով վերոնշյալ խնդիրները դիմում ենք Ձեզ խնդրանքով՝ մշակույթի նախարարությունում նշանակումներ կատարելիս նկատի ունենալ այնպիսի մարդկանց, որոնք չեն անցել այս կլանային օղակների պարունակներով և ունենալու են քաղաքական կամք և սկզբունքայնություն՝լուծելու այս բոլոր խնդիրները, որոնք, համոզված ենք, առկա են ոչ միայն կինոյի և թատրոնի, այլ նաև մշակութային մյուս ոլորտներում, որոնց խնդիրների բարձրաձայնումը, հույս ունենք, կլինեն մշակութային մյուս ոլորտների ներկայացուցիչներից:

Հարգանքով՝ Արսինե Նավասարդյան և ուրիշներ

Աղբյուրը