ԱՄՆ նախագահի թեկնածու Ջո Բայդենը խոստացել է ճանաչել Հայոց ցեղասպանությունը

307

ԱՄՆ նախկին փոխնախագահ, դեմոկրատ Ջո Բայդենը, որը աշնանը կայանալիք ընտրություններում Թրամփի հավանական մրցակիցն է, Հայոց ցեղասպանության կապակցությամբ արված իր հայտարարությունում կիրառել է «ցեղասպանություն» բառը և խոստացել ընտրվելու դեպքում ճանաչել այն։

«Եթե ընտրվեմ, ես խոստանում եմ սատարել Հայոց ցեղասպանությունը ճանաչող բանաձևը և մարդու իրավունքները դարձնել իմ վարչակարգի առաջնահերթությունը», – ասել է Բայդենը:

«Այսօր ես միանում եմ ամբողջ հայությանն ու մեր ազգին մեծ նպաստ բերած ամերիկահայ համայնքին՝ հիշելով և հարգելով Հայոց ցեղասպանության զոհերին», – նաև նշել է Բայդենը։

2007-ին՝ սենատոր եղած ժամանակ Բայդենը աջակցել է Հայոց ցեղասպանության ճանաչման ջանքերին։ Նա, մասնավորապես, համահեղինակել է համապատասխան բանաձևը, որը սակայն չէր դարձել Սենատի քննարկման առարկա։